|
|
Jeddah(Berberatoday.com)-Muddooyinkii hore waxa lagu eedayn jiray boqortooyada ka talisa dalka Sucuudiga inay caddaadis ku hayso haweenka dalkaasi, haatan se waxa ka bilaabmay dalkaasi arrimo badan oo aan hore uga dhicin oo ay ka mid yihiin akadeemiyad loogu tala galay haweenka dalkaasi.
Akadeemiyadan ayaa loogu tala galay hawlaha la xidhiidha bandhiga qurruxda iyo tabbabarka Haweenka dalkaasi ee ah qaabka ay u adeegsan karaan waxyaabaha ay haweenku isku qurxiyaan, Akadeemiyadan ayaa waxay leedahay Masrax loogu tala galay bandhigyada moodeelada cusub ee dharka haweenka, taasi oo dalka Sucuudiga hore xaaraan ugu ahayd. Sidoo kalena, akadeemiyadan ayaa waxay noqotay tii koowaad ee caalami ah ee nooceeda oo kale ah ee laga furo dalkaasi.
Haddaba, waxa isweydiin leh sababta boqortooyada dalkaasi ku kaliftay inay bedesho siyaasadii soo jireenka ahayd ee ay boqolaalka sano ku soo dhaqeysay shacabkeeda?, Waa su’aal jawaabteeda laga ogaan doono mustaqbalka dhaw iyo natiijooyinka ka soo baxa isbeddeladaasi, dhinaca kale sawirada xafladii furitaanka akadeemiyadan oo baraha bulshada lagu baahiyay ayaa noqday kuwa aad ay shacabka dalkaasi u qaadaa dhigeen waxaana jira Rag badan oo arrintaasi ka soo hor jeedsaday kuna tilmaamay inay tahay mid dhaqanka dalkooda ka soo hor jeeda oo aan marnaba loo baahnayn, halka kuwa kale ku tilmaameen arrintaasi inay tahay horumar dhinaca arrimaha bulshada ah oo loo baahanyahay.
Berberatoday.com