|
|
Hargeysa(Berberatoday.com)-Ciidammada Booliiska Somaliland, ayaa ka hadlay Sababta loo xidhay Nin Magaciisu yahay Saleebaan Ibraahim Maxamuud, kaasi oo toddobaadkii hore Magaalada Burco ka sheegay hadal Booliisku ku sheegay Dambi.
Saleebaan Ibraahim Maxamuud ayaa Shir-jaraa’id oo uu Burco ku qabtay ku sheegay inuu Gobolka Saaxil oo uu dhalasho ahaan ka soo jeedo kaga dhawaaqi doono waxa uu ugu yeedhay ‘Saaxil State’, haddii buu yidhi Xukuumadda cusub ee Madaxweyne Biixi ay muddo 7 Maalmood ah meesha uga saari waydo Shirkad Maalgelineed oo Xukuumaddu ka diwaangelisay Imaaraadka Carabta isla-markaana uu Xilka ka qaadi waayo Wasiirka Arrimaha dibedda Dr. Sacad Cali Shire iyo Safiirka Imaaraadka Carabta u jooga Somaliland Baashe Cawil Cumar, kuwaasi oo uu sheegay inay Shirkaddaa u sameeyeen inay khayraadka Gobolka Saaxil kaga faa’idaystaan.
Laakiin, Ciidammada Booliska ayaa laba Maalmood ka dib hadalkaasi Xabsiga u taxaabay Saleebaan Ibraahim Maxamuud, iyagoo ku eedeeyay in Hadalka uu Warbaahinta mariyey yahay Dambi.
Afhayeenka Ciidammada Booliiska Faysal Xiis Cilmi oo Shalay ka hadlay Xadhigga Saleebaan ayaa yidhi “Ninka la yidhaahdo Saleebaan Ibraahim Maxamuud ee Ciidammada Booliisku ku xidheen Magaalada Burco, wuxuu ku hadlay waa dambi, waanu xidhan yahay.”
Afhayeenka Booliisku wuxuu sheegay in la baadhayo Kiiska Saleebaan Ibraahim Maxamuud, marka baadhistu dhamaantana Sharciga la hor-geyn doono “Marka baadhistu noo dhamaato waxa Kiiskiisa loo gudbin doonaa Xeer ilaalinta iyo Maxkamadda awoodda u leh, haddii ILLAAHAY yidhaahdo.”ayuu yidhi, Afhayeenka Booliiska Somaliland oo Shalay la hadlay Telefiishanka Eryal.
Halkan Ka Daawo Muuqaalka
Berberatoday.com