Ugu horrayn Siyaasi Cabdiqaadir Cali Obsiiye (Madaxweynaha Mustaqbalka) oo ha hadlaya in siyaasaddiisu aanay dhinacna ahayn laguna aqoon ee uu yahay mid mar walba u taagan danta qaranka ayaa waxa uu yidhi: “Dad badan ayaa waxa ay ka hadleen itijaaha siyaasiga ah ee Madaxweynaha Mustaqbalka iyaga oo qaarkood shaki galiyey dhexdhexaadnimadayda waxaanan doonayaa in aan halkan ka caddeeyo in aan ahay siyaasi dhexdhexaad ah oo danta qaranka mar walba u taagan. Bani aadamka waxa leexiya ama uu dhinac ku noqdaa ee u sabab noqda waxa ka mid ah hunguriga iyo maal jacaylka, Mansab jacaylka, qabyaaladda, waxaasoo dhammina aniga way iga madhan yihiin. Shakhsi ahaanna ma aqaano anuu laba wajiilaynta iyo munaafaqadda. Maalin maalmaha ka mid ah oo ahayd maalintii la yeedhiyey Natiijadii Cod Bixinta Doorashadii Madaxtooyada ee dalkeena ka qabsoontay ayaa aniga oo ka soo baxay Huteel Maamuus oo ku yaalla Caasimadda Hargeysa oo ay ahayd goor bacdal casar ah. Waxa aan ku soo baxay dhallinyaro badan oo wadada dhagxaan ku gooyay oo mudaharaad samaynaysa. Markii dhallinyarada qaar damceen in ay wax I yeelaan ayaa kuwii badnaa oo kale waxa ay yidhaahdeen Waar Ninkani waa Madaxweynihii Mustaqbalka oo waa dhexdhexaade ka daaya. Markaasaan qunyar isaga soo socday. Waxa la yidhi run sheeg wax kuu markhaati fura ma waydide. Sidaasi caruurtaasi ii arkeen ayaan u ahay nin dhexdhexaad ah oo hadba raacsan halka ay danta dadkiisa iyo dalkiisu ku jirto. Waxa aad igu taqaanaan in aan mar walba ka hadlo danta dalka taasaana umaddu kugu raacaysaa oo ay nagu jecel yihiin oo barnaamijkayaga nagu taageeraan. Marka aad tahay shakhsi shaqaysta oo xooggiisa la soo baxa oo aan cidna waxba uga baahnayn Alle mooyaane ee danta umadda ka hadla kaasi dhinac ma noqon karo oo kolba dhinaca danta umaddiisu ku jirto ayuu raacayaa waana sida looga baahan yahay siyaasiga doonaya in uu umaddiisa u hago wanaag. Maadaama aanu hunguri, kursi jacayl iyo mansab kale tooni I riixayn oo igu riixayn wax ka soo hor jeeda umaddayda marnaba dhinac noqon maayo oo dan gaar ah eegan maayo ee waxa aan u taagnaan doonaa una taaganahay siyaasad mabda’ ku dhisan oo qaranimo danta dadkiisuna udub dhexaad u tahay”.
Siyaasi Cabdiqaadir Cali Obsiiye waxa uu ka hadlay saamiga baarlamanka ee beelaha darafyada Somaliland waxaanu yidhi: “Dhinaca kale haddii aan ka hadlo Saami Qaybsiga Kuraasta Baarlamanka waxaan ku talinayaa in beelaha darafyada Somaliland laga fuudh yeelo oo la siiyo saami aad u ballaadhan. Waayo inta badan Beesha dhexe ayaa haddii ay shaqaale hoosaad tahay, haddii ay mansabyo kale tahayba badsata. Waxaan leeyahay waa in beelaha darafyada reer Somaliland doorkan sad-bursiimo la siiyo oo saami weyn laga siiyo kuraasta baarlamanka. Haddii sad-bursiimo la siin waayo waa in ay xaqooda helaan baan leeyahay. Si aan u helno beelo walaalo ah oo wax wada leh oo mid ah waa in aan xaqa beelaha wada siinnaa oo aan la kala badsan si aan u helno Somaliland la wada leeyahay”.
Dhinaca kale Siyaasi Cabdiqaadir Cali Obsiiye (Madaxweynaha Mustaqbalka) waxa uu taageero ballaadhan u muujiyey Go’aankii Madaxweynaha Jabuuti uu ku laalay heshiiskii uu kula jiray shirkadda Maamulka Dekedda Dooraale ee DP-World isaga oo Madaxweyne Muuse Biixi ugu baaqay in uu isna go’aan ka qaato shirkaddaasi oo in badan dadku ku eedaynayaan in aanay dani inoogu jirin haddii kale inta uu umadda hor yimaaddo u sheego haddii ay dani innoogu jirto heshiiskaasi. Siyaasi Obsiiye oo arrimahaasi ka hadlayaa waxa uu yidhi: “Waxaan doonayaa in aan halkan ka bogaadiyo oo ku hambalyeeyo Madaxweynaha Jamhuuriyadda Jabuuti ee aynu jaarka nahay go’aankii uu ka qaatay shirkadda DP-World waayo waa nin dadkiisa iyo dalkiisa u tudhaya. Waa nin in badan dalkiisa soo maamulayay meesha uu soo gaadhsiiyayna aad arkaysaan. Waxa uu u arkay uun in uu dan biday halkaasi ama go’aankaasi uu qaatay. Arrimaha ay shirkadda kaga cawdeen waxa ka mid ahaa in ay shaqo la’aan badeen dadkii badnaa ee dekedda ka shaqaysan jiray iyaga oo keenay shaqaale yar oo kooban oo inta badani ajanabi tahay. Dhammaan waxa ay Jabuuti kaga cabanaysay DPW waxa aan u arkayay wax macquul ah oo dantoodu ku jirto. Waxaanan leeyahay waxa uu ahaa go’aan wanaagsan oo aan ku taageersanahay. Soomaali ahaan, Derisnimo iyo walaalnimo ayaan ugu taageerayaa. Madaxweynaha Somaliland waxaan leeyahay waxaa lagaaga baahan yahay go’aankaasi oo kale. Waliba taadu way ka duwan tahay tiisa maadaama aanad ahayd Madaxweynihii hore ula galay heshiisyadii hore. Mudane Madaxweyne waxaan kuu soo jeedinayaa in DP-World iyo dhammaanba shirkadihii hore ee xukuumaddii hore dadka gaarka ah ku wareejisay dhammaantood baadhitaan iyo dib u eegis ku samee oo wixii aanay danta umaddu ku jirin meesha ka saar oo heshiisyadooda buri. Dib u qiimayntaasi haddii ay qaarkood macquul kuula ekaadaan dee iska daa. Haddii heshiiska DP-world aad u aragto mid ay dani ugu jirto qaranka sidiisa u daa haddii kale oo aanay innoogu jirina go’aan adag ka qaado oo la mid ah kaa Ismaaciil Cumar Geelle”.
Ugu dambayn Siyaasi Cabdiqaadir Cali Obsiiye (Madaxweynaha Mustaqbalka) waxa uu ka hadlay wada hadallada Somaliland iyo Soomaaliya waxaanu yidhi: “Hore ayaan in badan uga hadlay wada hadaladaasi. Su’aal kali ah ayuunbaan maanta halkan umaddayda ka waydiinayaa haddii ay yihiin xukuumadda, siyaasiyiinta, shacabka iyo guud ahaan umadda oo ah in ay su’aal kali ah is wadiiyaan kadibna jawaabteeda qaataan oo ku dhaqmaan. Waxa aad Is waydiisaan anoo hore u sheegay wakhtigii Munaasabka ahaa ee aan kala bixi lahayn Soomaaliya in ay ahayd wakhtigii Cali Mahdi iyo Janaraal Caydiid iyo siyaasiyiinta la mid ah joogeen Soomaaliya. Maanta haddaba su’aasha aan is waydiinaynaa waxa weeyi markii aynu wada hadallada albaabkooda furnay halkii aynu meeqaam ahaan taagnayn iyo waxa ay beesha caalamku innoo arkaysay iyo maanta halka aynu marayno in aynu is waydiino weeyi. Wada hadalladii ma waxbay innoo sii siyaadiyeen mise waxbay innoo dhimeen. Su’aashaasi oo kali ah is waydiiya kadib jawaabteeda qaata” ayuu hadalkiisa ku soo xidhay siyaasi Cabdiqaadir Cali Obsiiye oo mar walba ka hadla xaaladda dalka ee siyaasadeed.

Berberatoday.com