Guddoomiye Cabdiraxmaan Cirro, waxa uu ugu horreyn faahfaahin ka bixiyey sababta uu uga hadhay weftiga Somaliland ee ku maqan dalka Imaaraadka, waxaanu yidhi “Madaxweynuhu wuxuu u yeedhay labada Xisbi Mucaarid, waxaanu ka codsaday inay u raacaan socdaalkiisaasi oo sida uu sheegay lagu marti q            aaday si degdeg ah dalka Imaaraadka Carabta, hase yeeshee Anigu (Cabdiraxmaan Cirro) waan ka cudur daartay laba sababood awgood, ta hore waxa weeyi kulamadii hore ee ka dhacay Imaaraadka, anigu iyo xisbiguba (Waddani) qayb ka maanu aheyn, sababta labaadna waxa weeyi waqtiga uu Madaxweynuhu ii sheegay iyo waqtiga uu dhoofayey oo aad isugu dhawaa oo saacado yari u dhexeeyeen oo aan ii suurto galinayn in aan Xisbigaygii la tashado”.

Cabdiraxmaan Cirro waxa kale oo uu ka hadlay mawqifka Xisbiga Waddani ee heshiisyada xukuumadu la gasho waddamada kale iyo shirkadaha ba, “Xisbigu mawqif cad ayuu ka taaganyahay Qaranimada Somaliland iyo midnimada shacbigeeda iyo mid ahaanshaha dhulkeeda intaba, si buuxda ayuu u taageersanyahay, waxaanu taageersanyahay awooda uu Dastuurku siiyey Xukuumadda ee ah inay heshiis la gali karto waddan kale ama shirkado”. Guddoomiyuhu waxa kale oo uu intaasi ku daray, “Xukuumadu heshiisyada ay gasho Xisbi mucaarid ah ayaanu nahay oo rayi kale ayaanu ka qabi karnaa, oo Soomaaliya ayaa ka hadashay macnaheedu ma xallaalaynayo wixii mad-madow ah ee ay xukuumadu leedahay, oo mawqifka uu halkaa Xisbigu iska taagey wuu cadeeyay oo in dadka loo soo bandhigo si daah furan heshiisyada ay gashay Xukuumaddu”.

Guddoomiyuhu waxa kale oo uu farriin u diray dawladda Soomaaliya, “Waxa kale oo aanu u sheegaynaa qollada Soomaaliya in Somaliland tahay Qaran madaxbannaan oo Qaranimadiisii qaatay 26kii June 1960kii, hase yeeshee waxa uu Qaranimadiisa u sadqeeyay midnimada Soomaaliya iyo in la helo shantii Soomaaliyeed, Somaliland ciddina qori caaradii kumay geyn Xamar, maantana suurtogal maaha inay ciddi khasab ku geyso, ama khasab Soomaaliya kaga dhigto”.

Guddoomiyaha Xisbiga Waddani waxa uu mar kale ka digay heshiiska Saldhiga millatari ee dalka Imaaraadka Carabta laga siiyey Berbera, “Heshiisyadii ay gashay Xukuumadu ee uu ka midka ahaa Saldhigu, berrigii hore waxa la yidhi Silaanyo (Madaxweynihii hore) ayaa saxeexay, haatana waxa la leeyahay Muuse Biixi (Madaxweynaha) ayaa saxeexaya, immisa jeer ayaa la saxeexayaa bahalka, waxaanu qabnaa guud ahaanba Saldhigyo uma baahna Somaliland ee waxay u baahantahay Biyo ee biyihii Imaaraadku ku ballanqaadeen ayey shacbigu u baahanyihiin, waxaananu qabnaa in saldhigyadaasi keeni karaan in dawlado kale oo gobolka ahi ay colaadi ina dhex marto, oo Somaliland noqoto meel dawlado shisheeye ku tartamaan, waxaananu qabnaa mawqifkii uu Xisbiga Waddani ka qaatay markii hore ayuu haddana ka taaganyahay labada arrimood ba ee heshiiska Dekeda iyo Saldhiga millatari, waanu cadaa mawqifkaasi kii baanu ka taaganyahay”. Ayuu yidhi Guddoomiyaha Xisbiga Mucaaridka ah ee Waddani Cabdiraxmaan Maxamed Cabdillaahi (Cirro)

Berberatoday.com