Paris(Berberatoday.com)-Madaxweynihii hore ee dalka Faransiiska Nicolas Sarkozy ayaa dorraad oo Salaasa ahayd xabsi ku yaalla dalka Faransiiska loo taxaabay, kadib markii lagu helay dambi ah in uu lacag ka qaatay Madaxweynihii hore ee dalka Liibiya Ilaahay ha u naxariistee Kornayl Mucamar Al Qaddaafi kaasi oo ku caan ahaa saamayn weyn ee uu ku lahaa madaxda adduunka oo uu deeqo badan oo lacag ah qaarkood siin jiray.
Booliiska waddanka Faransiiska gaar ahaan kuwa la dagaalanka falalka dambiyada ah ayaa la sheegay in ay Su’aalo weediinayaan Madaxweynihii hore ee dalka Faransiiska Nicolas Sarkozy kuwaasi oo waydiinaya lacago laaluush ah oo la sheegay in uu ka qaatay Madaxweynihii hore ee waddanka Liibiya Kornayl Qaddaafi sannadkii 2007-dii.
Nicolas Sarkozy oo Madaxweyne ka soo noqday dalka Faransiiska ayaa Lacag gaadhaysa 50 milyan oo Euro ka qaatay Madaxweynihii hore ee dalka Liibiya, waxaana la sheegay in xilligaasi Sarkozy uu ku jiray ololihii doorashada Madaxtinimo ee dalka Faransiiska.
Wiilka uu dhalay Madaxweynihii hore ee dalka Liibiya Seyful Islam Al Qaddaafi ayaa horey u sheegay in uu hayo xog caddaynaysa lacagtii ay siiyeen Nicolas Sarkozy xiligii uu doorashada ku jiray sannadkii 2007-dii.
Waxaa xaalka ku sii xumeeyey Nicolas Sarkozy xog uu isna Warbaahinta siiyey Maal-qabeen Faransiis ah oo asal ahaan kasoo jeeda Lubnaan, kaasi oo ahaa ninkii isku xidhay Madaxweynihii hore ee Liibiya Mucammar Al Qaddaafi iyo Sarkozy , ninkan ayaa xaqiijiyey in malaayiin dollar uu Sarkozy ka helay dowladda Qadafi xiligii uu u tartamayey Madaxweynaha sannadkii 2007.
Madaxweynihii hore ee dalka Faransiiska Nicolas Sarkozy ayaa hore u beeniyay eedahan loo soo jeediyay, waxaanu hadda Sarkozy wajahayaa baadhitaano adag oo la xidhiidha kiiskan dorraad xabsiga loogu taxaabay oo la filayo in uu baadhitaan culus u gudbo. Waxaa lagayaabaa in Sarkozy ganaax lagu trido ama ugu yaraan xabsiga loo diro.