London(Berberatoday.com)-Shirkad tagaasida ee Uber ayaa sheegtay in ay hakisay tijaabooyinkii gawaadhida iskood isku wada ee aan darawalku kaxayn ee ay ka samaynaysay dhammaan magaalooyinka Waqooyiga Ameerika ka dib markii uu dhacay shil halis ah taasi oo wax weyn u dhimaysa xawaarihii ay ku socotay sumcadda ay gawaadhidaasi ka helaysay dadka oo aad u xiisaynayay.
Haweenay 49 jir ah ayuu gaadhi ku dhacay oo dhimatay iyada oo ka gudbaysay waddo isgoys ah oo ku taalla magaalada Tempe ee gobolka Arizona ee dalka Maraykanka.
Inkastoo gawaadhida is wadda ay shilal kala duwan sababeen, haddana waxaa loo arkaa in shilkani uu yahay midkii ugu darnaa kaasi oo saamayn xun ku yeelanaya dhaawacna u gaysanaya sumcaddii gaadiidkan is wada ee aan darawalka lahayn iyo maamulka shirkadooda oo walaac weyn ka muujiyey arrinkaasi. .
Dara Khosrowshahi oo madax ka ah shirkadda Uber ayaa sheegay in dhimashadani ay ahayd War Naxdin Badan isaga oo sheegay in ay aad uga xumaadeen maadaama ay ku faanayeen in gaadiidkan is wadaa uu ka shilal yaraan doono kuwa kale ee dadku kaxeeyaan maadaama meelo gaar ah laga hagayo oo ay tiknoolajiyad sarraysaa hagayso.
Booliisku waxay sheegeen in shilkani uu dhacay habeennimadii Axaddii, gaadhiguna uu ahaa mid is wada oo ka mid ah gaadiidka ay soo saarto shirkadda Uber. Balse waxaa isteerinka fadhiyay ruux si uu ula socdo xaaladda.
Booliisku waxay sheegeen in haweenayda dhimatay ay ka tallaabaysay goob aan loogu talagalin dadka lugaynaya, waxaana loola cararay cisbitaal deegaankaas ku yaallay, halkaas ayayna ku qudh-baxday muddo kooban markii gargaar degdeg ah loogu fidinayay balse nasiib darro ay ku guulaysan waayeen dhakhaatiirtii in ay xaaladdeeda wax ka qabtaan.
Waaxda badqabka u qaabilsan waddooyinka waawayn ee waddanka Maraykanka iyo waaaxda bad-qabka gaadiidka ee qaran ayaa sheegay in labadooduba ay kooxo u dirayaan magaalada Tempe si ay u soo dersaan xaaladdan shilka ah ee uu sababay gaadhiga iskii isku wada ee ka mid ahaa gaadiidka aan darawalka lahayn ee ay soo saarto shirkadda Uber waxaana laga yaabaa in ay dib u qiimayn ku sameeyaan gaadiidkaasi iyo sida ay u shaqayn karaan iyada oo muhiimadda koowaad la siinayo dadka waddooyinka maraya bad-qabkooda si aanay gaadiidkaasi waxba u yeelin.
Afhayeen u hadlay shirkadda Uber ayaa sheegay in ay ku kalsoon yihiin kalsooni buuxdana ku qabaa awoodda gaadiidkooda is wadaa u leeyahay in aanay wax dhibaato ah soo gaadhsiin dadka muwaadiniinta ah ee waddooyinka maraya isaga oo sheegay in muddo badan markii la soo saarayay gaadiidkan la daraaseeyey sida ay dadku uga badbaadi karaan gaadiidkan ee aanay gaadiidkani shilal u keeni lahayn taasina ay tahay arrin ay xaqiijiyeen balse shilkan ugu dambeeyey uu ahaa mid la mid ah shilalka dhaca ee caadiga ah isaga oo sheegay in haweenaydu waddo qaldan maraysay.