|
|
Hargeysa(Berberatoday.com)-Taliyaha Ciidammada Dab-damiska Jamhuuriyadda Somaliland Maxamed Xasan Sawaaxili, ayaa ka warramay dhibaatooyin uu sababay Roob laxaadle leh oo Habeen hore ka da’ay Magaalada Hargeysa.
Roobkan oo ay ka dhasheen Daadad waaweyn, ayuu sheegay inuu sababay inay galaan Gurmad ballaadhan oo ay ku samato-bixiyeen Dad iyo Gaadiid ku xanibmay Meelaha Biyo-mareenka ah ee Caasimadda dhexdeeda.
Taliyaha Ciidammada Dab-damiska oo Shalay Shir-jaraa’id ku qabtay Xafiiskiisa Magaalada Hargeysa, ayaa isagoo Arrimahaa ka hadlaya yidhi “840 Telefoon baa Xalay (Habeen hore) nagu soo dhacay oo Samato-bixin u baahnaa..”
Taliyuhu wuxuu sheegay in Daadadka ka dhashay Roobkaasi sababtay in Dad la waayo “Haddii aan idiin akhriyo dhibaatada dhacday waxa ka mid ah Saddex Qof oo la waayey, dhaawaca laba Qof oo Ciidammada Dab-damiska ah ayaa jiray, Samato-bixinta 48 Qof oo Dooxa iyo Biyo-mareennada ku xanibnaa ah, 31 Gaadhi ayaanu ka soo jiidnay Biyo-mareennada, ka hor-tagga Shoodhka Laydhka, 8 Hawl-gal ayaanu qabanay”ayuu yidhi, waxaanu intaa ku daray oo uu soo bandhigay caqabadaha Ciidan ahaan haysta “Caqabadaha na haysta waxa ka mid ah Saxmadda Gaadiidka oo aan Gurmad laga fidin Karin, waxa kale oo caqabad nagu ah Biyo-mareennada la dhistay ama lagu soo dhawaaday…”
Taliyuhu ma faahfaahin in Saddexda Qof ee la waayey Habeen hore markii Roobku ka da’ay Hargeysa la helay iyo in kale.
Berberatoday.com