Hargeysa(Berberatoday.com)-Xukuumadda Somaliland ee uu hoggaamiyo Madaxweyne Muuse Biixi ayaa sheegtay in hay’adaha iyo waddamada Caalamka ee xidhiidhka la leh Somaliland ay si toos ah kaalmadooda usoo gaadhsiiyaan oo aanay cid kale u soo marin, isla markaana ay hay’adaha UN-ta, iyo kuwa Caalamiga ah iyo kuwa Maxaliga ahi dhammaantood ay dalka kaga hawlgalaan ogolaanshaha Xukuumadda.

Wasiir ku xigeenka Wasaarada Qorshaynta Qaranka Md Xuseen Ibraahim Buuni, oo ka jawaabaya hadal uu dhawaan ku sheegay Siyaasi Maxamed Xaashi Cilmi inay hay’aduhu dalka Somaliland ku joogaan ogolaansho dawlad kale oo shisheeye, ayaa waxa uu yidhi, “Hay’adaha dalka Somaliland ka hawlgala waxay kaga hawlgalaan oo ay kaga shaqeeyaan ogolaansho ay ka haystaan dawladda Jamhuuriyadda Somaliland, hay’adaha Caalamiga ahi waxay iska diwaangaliyaan Wasaaradda Qorsheynta oo annaga ayaa runtii guud ahaan la macaamilkooda, ka war hayntooda, la shaqeyntooda iyo kormeerkooda ba qaabilsan haddii ay yihiin hay’adaha Qaramada Midoobay, Caalamiga ah, iyo Qaadhaan bixiyeyaasha, iyo kuwa maxaliga ah ee dalka laga leeyahay, waxaanay Qarankeena kula shaqeeyaan ogolaanshahaasi, wallow kuwa UN-tu leeyihiin xasaanad oo aan loo diwaangelin hay’ad ahaan, haddana waxay inagula shaqeeyaan ogolaanshahaasi”. Buuni waxa uu intaasi ku daray, “Somaliland waa dal madaxbannaan oo buuxiyey shuruudihii looga baahnaa in dal lagu ictiraafo”.