|
|
Hargeysa(Berberatoday.com)-Shaqaalaha Kala Duwan ee Ka Hawl Gala Dawladda Hoose ee Magaaladda Hargeysa ayaan badhkood Bishii labaad aanay wax mushahaar ah qaadanin, halka kuwo kalena la sheegay in iyaguna ku leeyihiiin afar bilood mushahaarkii ay xaqa u lahaayeen.
Qaar ka mid ah Shaqaalaha Ka Hawl Gala Dawladda Hoose oo ka gaabsaday in ay magacyadooda sheegaan ayaa u sheegay Ilaysnews.com in aanay garanayn sababta aanay weli u qaadanin mushahaarkoodii.
“Walaal muddo laba bilood ah maanu Qaadan Wax mushahaar ah, xafiiskii bixin jiray Mushahaaraadkuna waxa uu noo sheegayaa in aanay wali wax lacag ahi soo gaadhin” Sidaas waxa Ilaysnews.com u sheegay mid ka mid ah shaqaalaha Dawladda Hoose oo ka gaabsaday Magaciisa in la sheego.
Ilo wareedyo u dhuun daloola Shaqada ka socota Dawladda Hoose ee Hargeysa ayaa sheegaya in Lacagihii loogu talo galay shaqaalaha ay ku takri faleen masuuliyiinta Dawladda Hoose.
Xoghayaha Dawladda Hoose ayaa isagu arrimo caafimaad dalka dibadiisa ugu baxay, hasayeeshee Duqa Caasimada ayaan ilaa iminka laga war haynin waxa uu ku foogan yahay, maadama ay jiraan cabashooyin baan oo isu dulyaalaa.
tan iyo intii uu xukunka La Wareegay Madaxweyne Muuse Biixi Cabdi waa hay’addii labaad ee ay shaqaalaheedu ka cawdaan Mushahaar la’aan, waxaana laba todobaad ka hor iyaguna cabasho ka muujiyay mushahaar la’aan shaqaalaha Madbacada Qaranka.
Xigasho Ilaysnews.com