|
|
Hargeysa(Berberatoday.com)-Madaxweynaha waddanka Ruushka Vladimir Putin ayaa ku wargeliyey ciyaaryahannada dalkiisa inay dhamaantood iska soo xaadiriyaan oo ay yimaaddaan aqalka Kremlin ee looga taliyo dalkaas kaddib markii ay ka hadheen Koobka Adduunka ciyaartii ay kaga hor yimaaddeen Croatia oo rikoodheyaal lagaga badiyey.
Ruushka oo martigeliyey tartanka Koobka Adduunka ayaa soo bandhigay qaab ciyaareed wanaagsan, waxaanay iyadoon la filaynin u gudbeen wareegga siddeed dhamaadka iyagoo ka adkaaday Spain oo ka mid ahayd dalalka ugu awoodda badan, hase yeeshee waxa rikoodheyaal dirqi ah ku reebay waddanka Croatia, taas oo haddii ay ku adkaan lahaayeen ay ka mid noqon lahaayeen afarta dal ee isugu soo hadhay Koobka Adduunka.
Markii ay ciyaartu dhamaatay, ra’iisalwasaaraha waddanka Ruushka Medvedev ayaa shaaciyey inuu u hambalyeynayo xulkiisa oo si wanaagsan ay u ciyaareen, sharaf badanna ay soo hooyeen, hase yeeshee nuskii dambe ee xalay ayaa afhayeenka madaxtooyada Ruushka oo lagu magacaabo Dmitry Peskov waxa uu sheegay in tababaraha iyo dhamaan ciyaartooyadaba looga yeedhay aqalka madaxtooyada ee Kremlin, halkaas oo madaxweyne Putin uu ku sugayo.
Madaxweyne Putin ayaa ka hor intii aanay bilaabanin ciyaartii guul-darradu waxa uu khadka telefoonka kula hadlay tababare Cherchesov oo uu u rajayey guul, hase yeeshee telefoonkaas kuma faa’iidin, waxaana uu u dhallay guul-darro.
Berberatoday.com
Sports News