|
|
Dawladda Kenya Oo Xidhay Dr Bursaliid
Dr Ibraahim Faarax Bursaliid oo arrimaha siyaasadda ka faaloooda ayaa lagu xidhay magaalada Nairobi.
Dr Bursaliid ayaa xalay laga kaxeystay gurigiisa, sida ay xaqiijiyeen ilo isaga ku dhow. “Waxaa tagay gurigiisa askar dhar cad ah oo soo u kexeeyay saldhig ciidan.”
Waa macallim jaamacadeed oo ku takhasusay arrimaha xidhiidhka caalamiga ah, kana faallooda xaaladaha Afrika iyo caalamka.
Ma cadda sababta loo xidhay illaa iyo hadda. Wuxuu bare ka ahaa jaamacad ku taalla Nairobi. Wuxuu BBC Somali u sameeyaa falanqeynno ku saabsan arrimaha Soomaaliya iyo caalamka.
Dr Cabdiwahaab Sheekh Cabdisamad oo saaxiibo ay yihiin ayaa BBC Somali u xaqiijiyay xadhigga, wuxuuna tilmaamay in ay qareenno u qabteen oo ay arrinta hadda ku howlan yihiin.
“Sababta xadhigga war uma hayno, balse waxay ku qasban yihiin in 24 saacadood gudahood ay maxkamad ku keenaan”, ayuu yidhi.
Qaar ka mid ah siyaasiyiinta Soomaalida ee Kenya ayaa dhankooda isku deyaya in la siidaayo Dr Ibraahim Faarax Bursaliid.
Source: BBCSomali