|
|
Doha(Berberatoday.com)-Wararka ka imanaya magaalada Dooxa ee xarunta dalka Qatar ayaa sheegaya in uu goor dhaw halkaasi ku geeriyooday gudoomiyihii gobolka Banaadir Eng Cabdiraxmaan Cumar Cismaan.
Sida lagu baahiyay wakaalada wararka Soomaaliya ee Sonna ee dowladda Soomaaliya, waxaa arrintan xaqiijisay Wasiirka Dhalinyaradda iyo Ciyaaraha Xukuumadda Federaalka Soomaaliya, Marwo Khadiijo Maxamed Diiriye.
Eng Yariisow ayaa lagu dabiibayay cisbataal ku yaalla magaalada Dooxa ee dalka Qatar ka dib dhaawicii ka soo gaaray weerarkii lagu qaaday xarunta aqalka Dowlada Hoose.
Ururka Al-Shabaab ayaa sheegtay weerarka lagu bartilmaameedsaday xarunta dowladda hoose ee Muqdisho.
Qaraxa ayaa ka dhacay xilli uu maamulka Gobolka Banaadir halkaasi uga socday shir toddobaadla ah oo ay yeeshaan.
Xaruunta gobolka Banaadir waxay ka mid tahay xaruumaha dowladda ee sida weyn ammaankooda loo adkeeyo.
Berberatoday.com