|
|
Tukaraq(Berberatoday.com)-Taliyaha Ciidanka Millateriga Somaliland, ayaa hanjabaad culus u diray masuuliyiin Wasiirro ka mid yihiin oo Puntland ka tirsan, isla markaana safarro ku joogay maalmahan magaalada Buuhoodle ee xarunta gobolka Buuhoodle, waxaanu sheegay inay tallaabo adag ka qaadi doonaan haddii aanay si dhaqso ah uga bixin ciidda Somaliland.
Ciidammada Somaliland waxay hawlgal nabadgelyada lagu sugayo ka sameeyeen nawaaxiga Buuhoodle, isagoo Taliyuhu ugu baaqay Waftiga Buuhoodle jooga ee Puntland inay iskaga baxaan dhulka Somaliland iyaga oo nabad-qaba. Waxaanay Saraakiil kale oo Millateriga Somaliland u hadlay sheegeen inay xidheen waddo kasta oo ay rabaan inay maraan Waftiga Maamulka Puntland inay uga soo gudbaan Buuhoodle, si ay u yimaaddaan Horufadhi iyo Ceegaag oo ay ka socdaan shirar lagu nabadaynayo beelo walaalo ah oo shaqaaqo deegaannadaas ku dhex-martay dhawaan.
Nuux Ismaaciil Taani Taliyaha Millateriga Somaliland, waxa uu sidaa ku sheegay mar uu hadal ka jeediyey Xerada Millateriga Somaliland ee deegaanka Tukaraq ee gobolka Sool, halkaas oo uu qaar ka tirsan Saraakiisha ku guddoonsiiyey Billad-geesi uu Madaxweynuhu ugu dhiibay Saraakiisha mutay ee ciidanka ka tirsan.
Taliye Nuux waxa uu sheegay inay Somaliland mar walba ilaaliso nabadgelyo kula noolaanshaha iyo deris-wanaagga dalalka la jaarka ah, isla markaana aanay marna amni-darro horseed u noqon, balse haddii ay Puntland joojin weydo daandaansiga ay ku hayso Somaliland oo ay dagaal isu diyaariso inay cawaaqib-xumo ka mudan doonto, welise uu ay nabad ugu baaqayaan.
Haddaba, Taliyaha Ciidanka Millateriga Somaliland Nuux Ismaaciil Taani, oo Billadaha Saraakiisha la siiyey iyo qodobbadaas kale ee amniga la xidhiidha ka hadlaya, waxaannu warkiisa idiinku soo gudbinaynaa Muuqaalkan hoose ee daawasho wanaagsan
Berberatoday.com