|
|
Beledweyne(Berberatoday.com)-Dagaalo xoogan, ayaa maanta markale ku dhexmaray deegaanka Dharkeynta ee duuleedka Magaalada Baledweyne laba Maleeshiyo beeleed oo muddo laba todobaad ka badan ku dagaalamaya deegaano ku yaala Galbeedka Baledweyne
Khasaaro kala duwan oo dhimasho iyo dhaawac leh, ayaa ka dhashay dagaalka maanta inkastoo aanan la ogeyn khasaaraha rasmiga ah ee dagaalka maanta.
Dagaalkan, ayaa imanaya xili gudaha magaalada Baledweyne maalintii shalay ahayd shir lagu heshiisiinaayo labada beelood uu ka furmay magaalada Baledweyne kaa soo ay gadhwadeen ka yihiin Wasiiro iyo Xildhibaano ka tirsan Dowladda Faderaalka Soomaaliya iyo maamulka Hirshabeelle kuwaas oo dhawaan Baledweyne u yimid xal u helida dagaalka u dhaxeeya labada Maleeshiyo beeleed.
Geesta kale, wasaaradda arrimaha gudaha Xukuumadda Soomaaliya, ayaa ku baaqday in deg deg loo joojiyo dagaal beeleedka ka socda duuleedka Baledweyne.
Wasaaradda, ayaa sidoo kale fartay dhamaan qaybaha kala duwan ee bulshada labada beelood iney ka qeyb qaataan dadaalada nabadeed ee lagu doonayo in lagu soo afjaro dirirta u dhaxeeysa labada Maleeshiyo beeleed ee walaalaha ah.