|
|
Muqdisho(Berberatoday.com)-Maxkamadda ciidamada ee Soomaaliya, ayaa maanta billowday dhageysiga dacwadda laba eedaysane oo Ajnabi ah, oo loo haysto inay ka tirsan yihiin ururka Al-Shabaab.
Maxkamadda ciidamada Soomaaliya
Eedeysaneyaashan oo maanta ka soo hor-muuqday maxkamadda ciidamada Soomaaliya, ayaa waxay u kala dhasheen dalalka Malaysia iyo Britain, balse weli lama shaacin magacyadooda.
Eedeysanayaasha, ayaa loo haysta inay sifo sharci darro ah ku soo galeen Soomaaliya iyo inay ka barbar dagaalameen kooxda Al-Shabaab.
Sidoo kale, labada eedeysane, ayaa waxaa loo haysta in mudadii ay ku sugnaayeen Soomaaliya ay geysteen tacadiyo iyo gabood falo ka dhan ah muwaadiniinta, ayna ka qayb galeen weeraro argagixisinimo.
Labada eedeysane ee maanta maxkamadda Soomaaliya la horgeeyay, ayaa waxay kamid noqonayaan eedeysanayaal dhowr ah oo dacwado la xidhiidha Argagixiso loo haysto, kuwaasi oo dhagaysiga dacwadooda ay billowday maxkamadda ciidamada Soomaaliya.
Berberatoday.com