|
|
Boorama(Berberatoday.com)-Wasiirka Wasaaradda Hawlaha Guud, Dhulka iyo Guryaynta Somaliland Cabdirashiid Xaaji Ducaale Qanbi oo shir jaraa’id ku qabtay Magaaladda Boorama, ayaa ugu baaqay Mudanayaasha Gollaha cusub ee Wakiilladu inay u doortaan Shirgudoonka golahaasi Xildhibaan Yaasiin Xaaji Maxamud Xiir Faratoon.
Wasiir Qambi
Wasiir Qambi, ayaa waxa uu sheegay in Xildhibaan Faratoon uu yahay Oday Mas’uul ah Mudo badana ahaa Xildhibaan ka tirsan Gollaha Wakiiladda, Sidoo kalena uu mudo dheer soo ahaa Wasiir Xilal ka soo qabtay Xukuumadihii isaga danbeeyay taladda Somaliland, isaga oona xusay in Faratoon uu wax badan ka yaqaano Xidhiidhada Baarlamaanka.
Waxa kale oo uu Wasiirka Qambi Sheegay in Xildhibaan Faratoon uu maanta yahay Oday isku wadi kara Mucaaridka iyo Muxaafidka ku wada jira Gollaha Wakiillada.
Wasiirka, ayaa sidoo kale sheegay in hadii Prof, Yaasiin Xaaji Maxamud Xiir Faratoon loo dooran waayo Gudoomiyaha Gollaha Wakiillada uu soo jeedinayo inuu booskaas buuxiyo Xildhibaan Barkhad Jaamac Batuun oo uu ku tilmaamay Garyaqaan iyo aftahan da’yar .
Wasiirka Wasaaradda Hawlaha Guud, Dhulka iyo Guryaynta Somaliland Cabdirashiid Xaaji Ducaale Qanbi, waxaa uu ku sifeeyay Xildhibaan Cabdirisaaq Khaliif oo Jagadaasi u tartamaya inuu yahay Siyaasi mudo kooban ku dhex jiray Saaxada siyaasadda isla markaana qaab mucaaridnimo uga baxay Xukuumadii uu ka tirsanaa .
Wasiir Qambi, ayaa talo waayeelnimo u soo Jeediyey Xildhibaan Cabdirasaaq Khaliif Axmed, wuxuu xasuusiyey kaalinta waalidnimo ee Faratoon ugu toosanyahay, wuxuuna ugu baaqay in aanu la Tartamin Adeerkii sida uu sheegay Wasiirku.