“Ilaahay Uun Baa Deeqdiisa Dadka Wada Gaadhsiiya Ee Runtii Waxa Inagu Habsaday Maqaadiir Laynagu Imtaxaanayo Oo Ay Tahay…”Jamaal Cali Xuseen

April 3, 2022 - Written by admin

Ilaahay uun baa deeqdiisa dadka wada gaadhsiiya ee runtii waxa inagu habsaday maqaadiir laynagu imtaxaanayo oo ay tahay:

1. In laynagu eegayo sidaynu isu gargaarno. Waxyaalo ka xun baynu ka soo dabaalanay Oo dagaalo iyo burbur magaalada dhulka lala simay baynu soo marnay. Iyadoo gargaarkii dawladda iyo wadamadda kale aynu rajaynayno hadana maanta shicibku haysku tashado oo imika guddi isku dhafan oo ganacsadata, iyo arrimaha bulshada ka koobani ha abaabulaan accounts bank iyo Zaad nambaro lagu soo shubo sakada, sadaqadda iyo deeqda loogu talo galay dadka dhibaatadu ku habsatay. Si inta aan arrinka la ilaawin dadku lacagta Ugu shubaan.

2. Mida kale ganacsatadu fadlan shicibka haw naxariisto Oo yaan 5 jeer Oo macaasha la saaran shayga weliba xilliga Ramadaan. Sicir bararku waa aafooyinka bulshadda burburiya doorka ay dawladu ku leedahay la dagaalankiisa mooyee, doorka ganacsadata ayaa muhiim tahay in ka feejignaadan.

3. Ganacsadatadda uu maalku kaga lumay dabka suuqa waaheen waxa soo raaca danyartii kumaan kunka ahayd ee ka shaqaysan jirtay meheradaha kala duwan Oo maanta meel ay u foofaan aanay jirin. Deeqda la ururinayo waa ka kow in kuwaasina la ogsoonaado sida ugu dhakhsaha badan. Ilaahay wax lagu cibro qaato wuu ina tusay, Ilaahay baynu ka baryayna inuu degdeg inooga saaro xaaladan aynu galnay Oo aynu isku duubnaan iyo dedaal iyo isu naxariis kaga bixi karno. Ilaahay dadkayaga dhibaatadda ka saar, bogoodana burcad isu mari. Ramadaan Kareem.

Waxa Qoray Aqoonyahan Jamaal Cali Xuseen