Qeybta hore ee ciyaarta ayaa lagu kala nastay 2-0 uu ku hoggaaminayay xulka qaranka Argantina.

Daqiiqadii 23-aad Argantina ayaa loo dhigay rigoore waxaana gool u badelay Lionel Messi, ciyaarta ayaa waxay sidaas ku noqotay 1-0.

36 daqiiqo marka ay dheesha mareysay Di Maria oo caawin ka helay saaxiibkiis Alexis Mac Allister ayaa wuxuu ciyaarta ka dhigay 2-0 uu ku hoggaaminayay xulka qaranka Argantina.

Qeybta labaad ee dheesha marka dib leysugu soo laabtay labada dhinac ayaa waxay soo bandhigeen qaab ciyaareed aad u wanaagsan, iyagoo sameeyay fursado badan ee goolal loo filan karay.

Daqiiqadii 80-aad xulka qaranka France ayaa dhaliyay gool waxaana ciyaarta 2-1 ka dhigay Kylian Mbappé, kaddib markii uu gool u badelay rigoore uu garsooraha ku abaal-mariyay.

Laakiin waxay wax walba is badeleen daqiiqadii isla daqiiqadii 81-aad kaddib markii dheesha 2-2 uu ka dhigay weeraryahanka kooxda Paris Saint-Germain ee Kylian Mbappé.

Ugu dambeyntii 90-kii daqiiqo ee ciyaarta loogu talagalay ayaa waxay ku dhammaatay barbardhac 2-2 ah waxaana lagu daray 30 daqiiqo oo dheeri ah.

Daqiiqadii 108-aad Lionel Messi ayaa markale hoggaanka u dhiibay xulka qaranka Argantina kaddib markii uu dheesha ka dhigay 3-2.

Laakiin xulka France oo aanan quusan ayaa daqiiqadii 118-aad wuxuu helay rigoore waxaana gool ka dhigay Kylian Mbappé, ciyaarta ka dhigay barbardhac 3-3.

Balse ugu dambeyntii ciyaarta oo kale ku dhammatay barbardhac ayaa waxaa koobka ku guuleystay xulka qaranka Argantina kaddib markii rigoorayaal 4-2 ah uu kaga qaaday dhigooda France.