War saxaafadeedka Wasaaradda Arrimaha Dibedda oo dhamaystiran ayaa u dhignaa sidan;

Ciidammada Ammaanka ee Jamhuuriyadda Somaliland, ayaa xaqiijiyey in ku dhawaad 600 oo ka mid ah kooxaha nabad-diidka ah oo uu wato Fu’aad Maxamed Qalaf (Shangoole) oo ka mid ah horjoogayaasha Al-Shabaab inay soo galeen magaalada Laascaanood ee Gobolka Sool, Jamhuuriyadda Somaliland labadii maalmood ee u dambeeyey, arrintaas oo sii korodhisay welwelka ka dhex jira muwaadiniinta. Ilo xog ogaal ah ayaa sheegay in ujeedka socdaalka Shangole uu yahay sidii maleeshiyaadka deegaanka loogu tababari lahaa diyaarinta walxaha qarxa iyo sidii Al-Shabaab saldhig uga sameysan lahaayeen buuraleyda Ceerigaabo ee gobolka Sanaag.

Dhawrkii bilood ee la soo dhaafay, Laascaanood waxaa ku soo badanayay weerarada, dadaalada qorista, iyo faafinta dacaayadaha xagjirka ah. Dhaqdhaqaaqyadan ayaa wax u dhimaya dadaallada ay dowladda iyo ciidamada ammaanku ku doonayeen in ay ku ilaaliyaan ammaanka iyo kala dambeynta deegaanka. Kor u kaca dhacdooyinka rabshadaha wata iyo fikradaha xagjirka ah ayaa khatar weyn ku ah nabadda iyo xasiloonida Somaliland iyo guud ahaan gobolka.

Xukuumadda ayaa walaac xooggan hore ugu gudbisay beesha caalamka iyo hay’adaha kala duwan ee nabad-gelyada ee mandaqadda, iyadoo dhacdooyinkani khatar ku yihiin hab-dhaqanka bulshada iyo dalka. Kor u kaca dhaq-dhaqaaqa xagjirka ah kuma eka oo kaliya in uu saameeyo amniga Laascaanood balse waxa ay sidoo kale awood u leedahay in ay ku soo qulqulaan gobolada deriska la ah, taas oo sii xumaynaysa xasiloonida deegaanka.

Xukuumadda oo kaashanaysa ciidamada ammaanka ayaa qaadaysa tallaabooyin degdeg ah oo wax lagaga qabanayo xaaladdan adag. Waxaa socda dadaallo lagu xoojinayo xog uruurinta, xoojinta amniga xuduudaha, iyo hagaajinta isku xidhka hay’adaha amniga si looga hortago khatarta Al-Shabaab iyo kooxaha kale ee xagjirka ah.

Dawladdu waxay ugu baaqaysaa beesha caalamka, dalalka deriska ah, iyo ururada gobolka ee ay khusayso inay gacan ka geystaan la dagaalanka argagixisada iyo xagjirnimada #Laascanod. Wadashaqeyn iyo iskaashi ayaa lama huraan u ah si wadajir wax looga qabto arrintan adag.

Sidoo kale, dawladdu waxay u soo jeedinaysaa bulshada deegaanka inay ka feejignaadaan wixii ay ka shakiyaan ama cid kasta oo ay ka shakiyaan. Dadaalka wadajirka ah ee dowladda, ciidamada amniga iyo bulshada ayaa muhiim u ah sidii looga gudbi lahaa khatartaas iyo soo celinta nabadda iyo xasiloonida Laascaanood.

Xukuumadda Somaliland ayaa xaqiijinaysaa inay ka go’an tahay bad-qabka iyo nabad-gelyada muwaadiniinteeda, isla markaana ay sii wadi doonto inay qaado tallaabo kasta oo lagaga hortagayo falalka xagjirka ah. Waxay ku adkaysanaysaa inay ka go’an tahay ilaalinta qiyamka nabadda, wadajirka ee aasaaska u ah  dalkeena.