Anwar Cabdiraxmaan Warsame Gudoomiyaha Dalada Guud ee Ururada Aan Dawliga Ahayn ee Sonsaf oo Werwer Ka Muujiyay Xaalada Sicir Barar ee Dalku Galay Iyo Sarifka Lacagta Dollarka oo Kor Ukacay

September 14, 2023 - Written by admin

“Dhawaaqa Muwaadiniinta kasoo yeedhaya ee ku saabsan nolosha cidhiidhiga gashay kadib markii ascaartii maciishadu korodhay iyada oo la saaray cashuuro dheerad ah, iyo qiimaha sarifka lacagaha qalaad oo sii kordhaya (Dollar Exchange) islamarkaana shaqo la’aan baahsani waddanka ka jirto waa arrin warwarkeeda leh.

Waxa aan ugu baaqayaa Xukuumadda in ay si dhakhso ah u qaaddo talaabooyin lagu xakamaynayo korodhka qiimaha quutal daruuriga oo wakhti xaadirkan sal u ah dhamaan adeegyada nolosha lagama maarmaanka u ah.

Ganacsatada Somaliland oo kaalin muhiim ah kaga jirta horumarka iyo adeegsiinta muwaadiniinta Somaliland, waxa aan usoo jeedinayaa in ay horseed ka noqdaan samata-bixinta muwaadiniinta.

Sida dhaqankeena iyo diinteenuba ina farayso waxa aan Muwaadiniinta Somaliland ku dhiiri-gelinayaa in ay iska war-hayaan, isna gargaaran iyada oo dadka jaarka ah iyo kuwa ehelka ahiba is kaalmaynayaan.

Waxa Qoray Gudoomiye Anwar Cabdiraxmaan Warsame