𝗫𝘂𝗸𝘂𝘂𝗺𝗮𝗱𝗱𝗮 𝗪𝗮𝗱𝗱𝗮𝗻𝗶 𝗠𝗮 𝗞𝗮 𝗥𝗮𝗮𝗹𝗶𝗯𝗮𝗮 𝗪𝗮𝘅𝗮 𝗞𝗮 𝗦𝗼𝗰𝗱𝗮 𝗦𝗼𝗼𝗹-𝗕𝗮𝗿𝗶?Siyaasi Nuuradiin Diini

August 1, 2025 - Written by admin

‎𝗫𝘂𝗸𝘂𝘂𝗺𝗮𝗱𝗱𝗮 𝗪𝗮𝗱𝗱𝗮𝗻𝗶 𝗠𝗮 𝗞𝗮 𝗥𝗮𝗮𝗹𝗶𝗯𝗮𝗮 𝗪𝗮𝘅𝗮 𝗞𝗮 𝗦𝗼𝗰𝗱𝗮 𝗦𝗼𝗼𝗹-𝗕𝗮𝗿𝗶?

𝗛𝗼𝗿𝗱𝗵𝗮𝗰:

Tan iyo markii xisbiga WADDANI uu la wareegay hoggaanka Somaliland, waxaa la filayay in si degdeg ah loo mideeyo shacabka Somaliland, waxna looga qabto arrimaha halista ah ee taagan, gaar ahaan dagaalka Laascaanood iyo faragalinta siyaasadeed ee dowladda Fedaraalka Soomaaliya ku hayso Somalind sida imaatinkii Raysal Wasaare Xamse ee Laascaanood. Hase yeeshee, waxa isa soo taraya dareenka bulshada ee ah in xukuumaddu ka gaabinayso waxa halkaa ka socda, kana aamusan tahay xaaladahaasi, taasoo abuurtay su’aalo la xidhiidha, Isbedeladda siyaasadeed, Kartida hoggaamineed iyo daacadnimadda qaranimada Somaliland, manay soo bandhigin qorshe balaadhan oo qadiyadaasi jawawaab u ah.

‎

Qormadan waxa aan ku faalayn doonaa arimo mihiima iyo su’aalo u baahan in laga jawaabo si aqoon iyo aragti leh , marka jawaab loo helana waxa cadaan doona jidka koo maraayo.

‎

‎Waajibaadka koowaad ee dawlada xil ka saaran yahay waa ilaalinta dalka iyo dadka asal ahaan labadaasi mid ka mida haddii la waayo ama wiiqmo waxa su’aali galaysaa jiritaankii qaranimo, sidee suuro gal u noqon kartaa in xududihii dalka laga dhiso maamul goboleed, ku lidi ah jiritaanka Somaliland?

Sidee loo aqbali karaa farogalinta Xassan Sheekh ku hayo Somaliland?

Labadan su’aalood ee kor ku xusani waa kuwo culus xukuumadda looga baahan yahay jawaab cad.

Haddaba waxa jira nidaam iyo shuruucdunidu ku dhisan tahay taasi oo aasaan u ah jiri taanka dal iyo dad qaran ah waxaana loo yaqaanaa xeerkaasi caalmiha ah ee aasaaska dawladnimo ” Montevideo Convention” .

‎1-Permanent Population,

‎2-Defined Territory,

‎3-Effective Government,

‎4-Capacity to Enter into Relations with Other States,

Afartaas qodob la’aantood dal ma dhisnaan karro lamana aqoonsan karro, marka la eego waxa Laascaanood ka socda waxa ay burinayaan tiirarkii jiri taan ee dal “qaranimo” sida qodobka labaad, “Xuduudo mucayin ah”, haddii xuduuddihii Somaliland laga dhisay maamul goboleed la yidhaa SSC-Khaatumo, sugnaanshaha qaran ee Somaliland miyaanu haadhin dhaawac sidee se looga hortagi karaa arintaasi oo ah laf-jab qaran.

‎

‎Ta kale dal aan difaaci karrin xuduudihiisa, dadkiisii, jiritaankiisii sideebuu u noqon karaa dal jira, oo difaacan karra masaaliixdiisa, qodobka afraad ee Montevideo Convention wuxuu lee yahay dalku waa in uu lee yahay awood lagula gali karro cilaaqaad ma jirtaa taasi maanta, marka lagu qiimeeyo waxa ka socda Sool-Bari? qadiyada intaas leeg maxaa af-ka looga xidhay?

‎

‎𝗫𝗶𝗴𝗮𝘀𝗵𝗼 𝗙𝗮𝗻𝗲𝗲𝗱; Faysal C. Mushteeg heeskiisii ayaa ahaa;

‎ “Iyagaa waxaan ka yabaalayaba

‎ Iiyeelayee,

‎ Waan yaabanee idinkuna dadyow

‎ ma ila yaaban tihiin”,

‎ma wax la aqblo ma tahay dib u qaabayn xuduuddeed, iyo qaybin intaas leeg oo dal iyo dadeedd?

‎

‎Intii xukuumadda Madaxweyne Cirro jirtay waxa ay ku baaqday Nabad taasi oo aan lahayn sumad iyo sawrac lagu sifeeyo, iyada oo dalkii la qaybinaayo lana astaynaayo xuduudo cusub oo gacan ku rimis ah sideedaba nabad loo gali karaa? Caadi ahaan haddi awoodaha iyo dagaaladu ay qaabeeyaan dunida ma la odhan karaa guuldaraddii Goojacade ayaa waji cusub u yeeshay Siyaasaddii iyo jiritaankii Somaliland nooca uu noqonaayo?

‎si kasta oo jab u yimaado ma in lays dhiibaa mise waa in qaranka la difaaco?

‎ 𝗫𝗶𝗴𝗮𝘀𝗵𝗼 𝗚𝗮𝗯𝗮𝘆; halgamaa Faarax Nuur;

‎”Lix halkaad ku joogtaan dagaal laabta ka ogaadda,

‎Luquntana haddii laydin jaro lugaha meermeersha,

‎Laqantooyo kaagama dartee laliya duulaanka,

‎Laarrigana ha daynina wixii lumaya yeelkiiye”

‎

‎𝗚𝗮𝗯𝗴𝗮𝗯𝗼.

Digniin iyo Dardaaran.

‎Ugu dambayn waxa aan ka digayaa in aan la daawan wax socda ee af iyo adinba lagaga hortago waxa kaliya ee lagu ilaalin karro jiritaanka JSl waa awood iyo cudud ciidan wixii intaa ka soo hadhdaa waa cambaarayn iyo fariimo dublamaasiyadeed, sidaasi oo ay tahay waxa waajib dastuuriyan ah in fadhiga laga kaco oo wax laga qabto arimahan socda oo raadayn ku leh qadiyada iyo madaxbanaanidda Somaliland, haddii aan laga hortagina waa mid mushkiladdeeda leh, dhamaan su’aalaha sare ku xusanina waa kuwo u baahan jawaab haddii aan laga jawaabina mustaqbalka madow galindoonta.

‎

‎Tallo Allaa leh, talaabana waa waajib.

‎