Xukumada Madaxweyne Cabdiraxmaan Ciro Iyo Ururka Warbaahinta Somaliland oo Yeeshay Kulan Lagu Dardargalinayo Ansixinta Xeerka Saxaafada”Daawo Muuqaal

August 26, 2025 - Written by admin

Xukuumadda Jamhuuriyadda Somaliland iyo warbaahinta madaxabannaan ayaa yeeshay kulan muhiim ah oo lagaga hadlay xaaladda warbaahinta, xadhigga soo noqnoqda ee weriyeyaasha, iyo sidii loo dedejin lahaa ansixinta xeerka saxaafadda Somaliland.

Kulankan oo ay ka qaybgaleen wasiirrada Madaxtooyada, Warfaafinta, Caddaaladda, iyo Arrimaha Gudaha, ayaa diiradda lagu saaray sidii loo abuuri lahaa jawi wada-shaqayn iyo kalsooni ku dhisan, loona dhammeystiri lahaa sharciyadii lagama maarmaanka u ahaa xorriyadda hadalka iyo madaxbannaanida saxaafadda.

Guddoomiyaha Ururka Suxufiyiinta Somaliland SOLJA iyo weriyeyaal kale oo halkaasi ka hadlay ayaa soo bandhigay tabashooyinka warbaahinta iyo cabashada ka dhalatay xadhigyada sii badanaya ee sharci-darrada ah. Waxa ay ku baaqeen in la dedejiyo hirgelinta xeerka saxaafadda iyo in la aasaaso Komishinka Warbaahinta Qaranka.

Dhankooda, wasiirradu waxa ay ballanqaadeen inay ka shaqayn doonaan horumarinta saxaafadda, ilaalinta xorriyadda hadalka, iyo joojinta xadhigyada aan sharciyadda waafaqsanayn.

Qodobada Muhiimka ah ee Shirka ka soo baxay:

1. In laga wada shaqeeyo sidii loo ansixin lahaa xeerka saxaafadda loona aasaasi lahaa Komishinka Warbaahinta Qaranka.

2. In la ilaaliyo madax-bannaanida saxaafadda iyo xorriyadda hadalka ee dastuuriga ah.

3. In dacwadaha ka dhanka ah suxufiyiinta iyo warbaahinta loo maro hab sharci ah oo caddaalad ku dhisan.

4. In la xoojiyo wada-shaqaynta xukuumadda iyo ururrada saxaafadda si loo horumariyo aqoonta iyo xirfadda weriyeyaasha.

5. In la sameeyo hannaan joogto ah oo lagu xallinayo khilaafaadka u dhexeeya warbaahinta iyo hay’adaha dawladda.

Kulanka waxa uu noqonayaa tallaabo muhiim ah oo loo qaaday dhanka dhisidda jawi saxaafadeed oo xor ah, sharci ku dhisan, isla markaana gacan ka geysan kara dimuqraadiyadda iyo horumarinta Somaliland.