MARXUUM MAXAMED FAARAX QABILE SHAQSI NOOCIISU KU YARAA AADAMAHA Qalinkii Cali Mahad Yuusuf

October 12, 2023 - Written by admin

MARXUUM MAXAMED FAARAX QABILE SHAQSI NOOCIISU KU YARAA AADAMAHA

Qalinkii Cali Mahad Yuusuf

Amin ku siman 2:00 Duhurnimo ee 11.10.2023. waxaa baraha bulshada kusoo dhacay Geerida AHN Marxuum Maxamed Faarax Qabile. Oo marka qiimayn lagu sameeyo qofkii uu ahaa noqonaya shaqsi sifooyin badan lahaa, Aqoonyahan Indheergarad ah, guurti aan xuduud lahayn, Samafale Naxariis badnaa, Mar kalena ahaa Nin Mayal adag oo Damiir xor ah leh.

AHN Maxamed F. Qabile oo xanuun Kedis ah ugu Geeriyooday Magaalada Burco halkaas oo u joogay. Nabadayntii Shaqaaqadii Cali Saahid. Xaqiiqa ahaana Geeridiisu waxay si weyn uga nixisay dhamaanba qaranka Somaliland. Marka dib loo milicsado Sooyaalkiisii Taariikheed wuxuu kasoo hawlgalay kaalmo dhowr ah oo ay adag tahay in qof keliyi daboolo. mudo dheer ayuu ahaa Macalin Barbaariye ah, Jiilal door ahna wax soo baray. waxa kale oo uu ka.qaybgalay Dagaaladii lagaga soo horjeeday nidaamkii Maxamed Siyaad Barre. lasoo noqoshadii

Madaxbanaanidana, aqoonyahankii u hawlgalay dhismaha Somaliland. ayuu kow ka.ahaa. 1991-1992 Xoghayihii u horeeyey D/Hoose Burco ayuu noqday.

sanado kadibna Maayarka Degmada Sheekh ayaa xigtay. Intii u dhaxaysay 29.9. 2005-31.5.2021 wuxuu kamid ahaa Baarlamaankii Somaliland. ee codka Shacabka ku yimi ee laga soo doortay Gobolka Saaxil

Waayahaasna wuxuu ahaa xildhibaan dhab ah oo Umadiisa la dareen ah, Nin Askari ah oo aan Magaalada Burco isku aragnay 2009 ayaa iiga waramay arin ku dhacday xili uu ka hawlgeli jiray Saldhig Boolis oo Hargeysa ah, waxaanu ii sheegay maalin xaaskiisii aad u xanuunsanaysay oo Sarkaalkii ka sareeyey u diiday Fasax. waxaana arintaa kala hadlay Taliye xigeenkii iyo dhowr askari oo xaaladayda ka war hayey. Laakiin Taliyihii wuxuu caayey Sarkaalkii ku xigey ee aniga ii hadlaayey, waxaana dhacday inay gacanta isula tagaan. markii la kala qabtay ayaa AHN Xildhibaan Maxamed F. Qabile oo qolo Saldhiga ku xidhan arinkooda u socday ayaa sheekadii la kulmay waxaanu iskuna dayay inuu xaalada dejiyo Laakiin Taliyihii baa u hanjabay

Intaa dabadeedna AHN MF.Qabile markii sidii wax u dhaceen mid mid uga waraystay Ragii joogay ayuu I kaxeeyey. Waxaana aanu toos ugu tagnay Taliyihii Ciidanka Booliska ee Xiligaas AHN Maxamed Saqadhi Dubad. Oo Taliskii guud jooga markii la yidhi Maxamed F. Qabilaa ku doonaya intuu degdeg usoo kacay. ayuu Salaan isula taagay. Waxaanu u sheegay arinka dhacay iyo kibirka Ninkaasi sameeyey. Baadhis degdeg ah kadibna waxaa cadaatay khaladka meesha ka dhacay. siduu ahaa, kadiba Hawshaydii si fìican bay u dhamaaday. weliba meel halkii hore dhaanta ayaa lay bedelay. waxaanse la yaabay markii aanu kasoo baxnay Xafiiskii Taliyaha ayuu 150$ (Boqol iyo konton doolar) gacanta iga saaray uu yidhi caruurta u gee. Intaa uu Ila socdayna yaad tahay iyo qoladaadu waayo mar qudha imuu odhan

Rabbi janadii Fardowsa haka waraabiyee markay Naxariis iyo samafal noqoto Ninka sidaas samayn kara ayuu ahaa umaduna isugu mid tahay.

Hibooyinkiisa gaarka ayay kamid ahayd Codkarnimada iyo balaaqadii lagu yaqaanay ee waxa u sheega oo si waafi ah loo fahmi jiray. Markaan soo koobo Dabeecadihiisiina wuxuu ahaa Qof aan odhan karo Noocìisu aad buu ugu yar yahay dadka Allaah haw naxariisto oo ha u nuuro Xabaasha Iilka.Neecaw udgoon iyo Haku siiyo Naruuro