Xasan Xaaji Cabdilahi Xasan Ganay Mucjisadii Fanka Somalida ee Lala Cajabay

October 20, 2025 - Written by admin

Awbaan Xasan Xaaji Cabdillaahi ” Xasan-Ganey” oo la weydiiyay, sababta ay u caan baxeen heesaha talantaaliga ah ee uu allifay. Waxa uu ku jawaabay”Labada qof ee wada heesaya, ereyada ay ku heesayaan waan isku miisaami jiray.

Metelan, haddii wiilku geel ku faano gabadhuna waa in ay ku faanto geel ama wax geela u dhigma. Haddii labadooda midi geel ku faano ka kalena adhi, heestaasi nuxur ahaan bay u dheeliyaysaa.

Dhinaca ammaanta aan idin ka tusee, heesta ay wada qaadaan Bacalwaan iyo Sahra Axmed. Bacalwaan waxa uu ku ammaanayaa gabadha “Moodda Galabeed” oo ah xilliga ay caceeddu dhacayso ama ay markaas uun dhacday, fadka dahabiga iyo casuusta iskugu jira ee Galbeed ka muuqda.

”Sida moodda galabtii

Dhulka oon madoobayn

Cadceeddiina maqantahay,

Wali maalintii iyo

Makhribkoo an kala guran

Labadaa marxaladood,

Iyadoon midnaba noqon

Oo midab dhalaaliyo

Soo baxay masciideed,

Muuqiyo adaa qurux,

Milgo iyo adaa sharaf

Iyo waliba meel joog

Rabbi kugu manaystee

Madaddaalo ramadley,

Mawle ha iskukeen simo”

Sahra Axmed, marka ay u halcelinayso Bacalwaan waxa ay ku amaanaysaa “Oogta Waaberi” oo ah xalliga cadceeddu soo baxayso, midabka dahabiga iyo casuusta iskugu jira ee arooryada hore jihada Bari ka muuqda.

“Sida muuni subaxeed

Habeenkoon mugdi ahayn

Cadceedduna mudh soo odhan

Madow yahay dhulkuna weli

Oo sagal macaaniyo

Fad malaasan iyo caad

Oo mayey ku caaridey

Saddexdu is muquurteen

Madaxana shucaac ku leh

Muuq iyo adaa qurux

Milgo iyo sharaf

Iyo weliba meel joog

Rabbi kugu manneeystaye

Mawle haysku keen simo.”

Mucjisada xero-udhalanka ah, waa Xasan-Ganey e’, bal sida labada xilli ee is ceshanaya, dulucda heesta ugu miisaamay, ka warrama?