|
|
Burco(Berberatoday.com)-Dabley aan la aqoonsan, ayaa habeen hore Duleedka Magaalada Burco ka Kaxaystay Ganacsade ka soo jeeda deegaanada Maamulka Goboleedka Puntland ee Dalka Soomaaliya.
Ganacsadahan oo lagu magacaabo Muuse Cabdalle Maxamed ayaa waxaa la sheegay inay dableydu ka dajiyeen Gaadhi uu ku safrayay, lama sheegin meesha uu u socday Ganacsadahani, balse waxa la sheegay inuu ka yimid Magaalada Garoowe ee Caasimadda Maamulka Puntland.
Dableydan Kaxaysatay ayaa Ganacsadaha la galay Buuraleyda Gobolka Togdheer ilaa iyo imikana laamaha Ammaanka Somaliland gacanta kuma soo dhigin Dableydaasi Kaxaysatay Ganacsadaha.
Guddoomiye ku xigeenka Gobolka Togdheer Maxamed Diiriye Xayd, oo Xaley Wargeyska Himilo Khadka Teleloonka kula xidhiidhay, ayaa sheegay in Dableydaasi ay Ganacsadaha u kaxaysteen Aano hore, isagoo sheegay in Dableyda qafaalatay ninkaasi ay sheegeen in ay u haystaan Wiil ay qaraabo yihiin oo ku xidhan magaalada Garoowe.
“Warkaasi wuu jiraa, nimankaas waa lagu daba jiraa, oo Buuraleyda ayay galeen” ayuu yidhi Guddoomiye Ku xigeenka Gobolka Togdheer Maxamed Diiriye, waxaanu intaa ku daray, “Waxay leeyihiin (Xaga Puntland ayaa Wiil) Maxkamad laga saaray ayay doonayaan oo ay u kaxaysteen, Ciidamada ayaa ku daba jira waxaanu jecelnahay ilaa Caawa (Xaley) inaanu soo qabano”
Berberatoday.com