|
|
Muqdisho(Berberatoday.com)-Madaxweynaha Suudaan Cumar Xassan Al-Bashiir ayaa baajiyey booqasho uu ku tegi lahaa caasimada Soomaaliya, sida ay warbaahinta maxaliga ahi ka soo xigatay xafiiskiisa.
Sarkaal ka tirsan madaxtooyada Suudaan ayaa u sheegay warbaahinta in Madaxweynuhu go’aansaday inuu joojiyo booqashadaas sababa la xidhiidha amaankiisa gaarka ah.
“Waxa la yaab nagu noqotay markii naloo sheegay in aanay Soomaaliya maamulin hawadeeda oo duulimaadyada laga hago dal kale” Ayuu yidhi sarkaalkaasi.
Wuxu ku sii daray in aysan suurtagal ahayn in Madaxweyne Al-Bashiir oo leh cadowyo badan inuu isku haleeyo hawada Soomaaliya maadaama aysan dowladu maamulin.
Sidoo kale, dowlada Suudaan waxay walaac ka muujisay ciidamo ku sugan gudaha Soomaaliya oo qaarkood aysan qayb ka ahayn hawlgalka nabad ilaalinta
Berberatoday.com