Boorama(Berberatoday.com)-Xoghayaha Warfaafinta Xisbiga Mucaaradka ah ee Waddani Cabdirashiid Xasan Mataan, ayaa talooyin u jeediyey Musharrixiinta Xisbiyada Kulmiye iyo Waddani oo uu ugu baaqay inay Shacabka ka wada raalli-geliyaan hadallada qadafka ah ee Bulshada kala fogeynaya ee ay sida Shaqsi-weerarka ah Warbaahinta qaarkeed isugu mariyeen Muuse Biixi iyo Cabdiraxmaan-Cirro.

Cabdirashadii Xasan Mataan oo magaalada Boorama ee xarunta gobolka Awdal Jimcihii Maanta Saxaafadda kula hadlay, waxa uu sheegay in Musharrixiinta Waddani iyo Kulmiye tartan ka dhexeeyo, waxa ay ku tartamayaanna yahay Shacabka Somaliland oo mudan inay midnimadooda iyo wada-jirkooda dhawraan oo aanay iyagu Bulshada qaybin, loogana baahan yahay siyaasad hufan iyo inay wada-jir Bulshada jawaab sax ah u siiyaan.