|
|
Hargeysa(Berberatoday.com)-Ciidammada Nabadgalyada Waddooyinka Somaliland, ayaa bilaabay dedaallo ay wax kaga qabanayaan dhibaatada Shilalka Gaadiidka oo ku soo badanaya Dalka, waxayna Mabnuuceen in Qof aan sidan ama aan lahayn Liisan uu Gaadhi kexeeyo.
Taliyaha Ciidammada Nabadgalyada Waddooyinka, ahna Afhayeenka Guud ee Ciidammada Booliiska Somaliland Faysal Xiis Cilmi oo Shalay la hadlay Warbaahinta, ayaa sheegay in Qofka liisan la’aan kaxeeya Gaadhi uu yahay dambiile isla-markaana Sharciga la hor-geynayo si loo Xukumo.
Taliyaha oo Arrimahaa ka hadlayaana wuxuu yidhi, “Ciidanka Nabad-galyada Waddooyinku aad buu u shaqeynayaa, waxayna qabanayaan wixii Sharcigu farayey oo ah inay eegaan Liisanka Wadayaasha Baabuurka, Buugga gaadhiga. Liisan La’aantu waa Dambi siduu qabo Qodobka 57 ee Xeerka Nabadgalyada Waddooyinku, weliba Ciqaab buu mudanayaa.”
Taliyuhu waxa kale oo uu sheegay, “Dhawaan Maxkamadda Degmada Hargeysa waxay xukuntay 9 Dirawal, kuwaasi oo lagu eedeeyay inay ahaayeen Bilaa Liisan, Xawaare sare-na ay waddooyinka ku marayeen, waalla qabtay oo Xabsiyada ayay ku jiraan.” Ayuu yidhi, waxaanu intaa ku daray, “Markaa waxaanu Dadweynaha sharafta leh u sheegaynaa in marka ay baabuurta kaxaynayaan ay soo qaataan Liisankooda iyo Buugga Gaadhigaba.”
Berberatoday.com