|
|
Ceelafweyn(Berberatoday.com)-Wararka kasoo baxay magaalada Ceel Af-weyn ee gobolka Sanaag, ayaa sheegaya in dablay hubaysani ay xalay fiidkii hore weerar gaadmo ah ka geysteen meherado ku yaalla magaalada oo ay dad rayid ahi ku sugnaayeen.
Weerarka hubaysan ee dableydani geysatey ayaa lashegayaa ilaa hadda in laba nin dhaawacmeen halka dhaawacyo intaas kasii badanna lagasoo sheegayo.
Warku waxa uu intaas kusii darayaa in dableyda weerarka geysatey halkaas ka fakadeen iyo weliba kadib markii ay rasaas badan huweyeen goobaha dadka ay bar-tilmaameedsanayeen ku sugnaayeen.
Dhinaca kalena Lama hayo ilaa hadda xaqiiqada dhabta ah ee weerarkani salka ku hayo waxase la tibaaxayaa in arrintu la xidhiidho dagaallo hore oo dhowaan meelo degaannadaas kamid ah ku dhexmaray qaar kamid ah beelaha degaannada degmada Ceel-afweyn.
Muddooyinkii ugu dambeeyey waxa jirey weerarro gaadmo ah oo ay isku qaadayeen laba beelood oo walaalo ah, kuwaas oo wada dega deegaanada ku hareeraysan magaalada Ceel af-weyn, balse weli ma jiro war xaqiijinaya inuu weerarkani xidhiidh la leeyahay aanooyinka qabiil ee labadaas beelood.
Berberatoday.com