|
|
“…markii aanu u dhabbo galnay ujeedada xadhiga Weriyahani ay kusoo Ururtay arrin Ugub ah, kaddib markii uu Wasiirka Madaxtooyaddu Md. Maxamuud Xaashi oo weriyahan si toos ah u bar-tilmaameedsadday isagoo sheegaya inuu Saxafi Maxamed Aadan Dirir yahay Nin Beesha Madaxweyne Siilaanyo kasoo jeeda, isla markaana aanay habooneyn inuu Baahiyo Wararka Lidka ku ah ee asxaabta Mucaaridka kaga imanaya Xukuumadda tallada haysa, balse uu baahiyo wararka lagu difaacaayo Xukuumadda Madaxweyne Siilaanyo,isagoo weriyaha ku waajibinaaya inuu Hab beeleed ku difaaco Xukuumadda uu wasiirka ka yahay”. Ururka Suxufiyiinta Somaliland ee SECJA
Hargeysa(Berberatoday.com)-Ujeedo, War-saxafadeed Cambaareyn: Ururka Saxaafadda Somaliland ee Secja waxa uu Cod dheer ku Cambaareynayaa Xadhiga Xaqdaradda ah ee lagula kacay Weriye Maxamed Aadan Dirir oo Maalintii Labaad sifo aan sharciga waafaqsanayn ugu Xidhan Magaaladda Hargeysa Aamaro gardaro ah oo kasoo kala baxay Wasiirka warfaafinta Somaliland Md. Cismaan Saxardiid (Caddani) iyo Wasiirka Madaxtooyadda Somaliland Md. Maxamuud Xaashi Cabdi.
Iyadoo markii aanu u dhabbo galnay ujeedada xadhiga Weriyahani ay kusoo Ururtay arrin Ugub ah, kaddib markii uu Wasiirka Madaxtooyaddu Md. Maxamuud Xaashi oo weriyahan si toos ah u bar-tilmaameedsadday isagoo sheegaya inuu Saxafi Maxamed Aadan Dirir yahay Nin Beesha Madaxweyne Siilaanyo kasoo jeeda, isla markaana aanay habooneyn inuu Baahiyo Wararka Lidka ku ah ee asxaabta Mucaaridka kaga imanaya Xukuumadda tallada haysa, balse uu baahiyo wararka lagu difaacaayo Xukuumadda Madaxweyne Siilaanyo,isagoo weriyaha ku waajibinaaya inuu Hab beeleed ku difaaco Xukuumadda uu wasiirka ka yahay. Waxa kaloo wax lala yaabo ah, waxa shalay isku mar lasoo qabtay weriye kale oo ka hawlgala Telefishanka Bulsho, kaasoo Wasiir Caddani isaga sii daayey, isagoo leh kana deer ayaan u ahay oo uu ii hoggaansamayaa. Balse waxa uu wasiirka warfaafintu xabsiga ku reebay weriye Maxamed Aadan dirir oo isaga uu ku xidhay sii deeyntiisa in wasiirka madaxtooyadda amarradiisa u hoggaansamo.
Hab-dhaqanka noocan oo kale ah oo wax lala yaabo ah, ayaanu hadaanu nahay Ururka Saxaafadda Somaliland ee Secja u aragnaa Cabudhin, la dagaalan Xoriyatul qawl iyo Dulmi laga geliyaa nidaamka Saxaafadda Xorta ah ee Somaliland oo Dastuurka Jamhuuriyadda Somaliland u damaanad qaadday inay saxaafadda si hufan oo dheeli tiran u baahiyaan Wararka Xukuumadda, Asxaabta iyo Siyaasiyiinta dalka iyo weliba aragtiyaha dadweynaha. Sidaas daradeed waxa uu Ururka Secja Wasiirka Warfaafinta iyo Wasiirka Madaxtooyadda ugu baaqayaan inay ka laabtaan hab-dhaqanka ugubka ah ee foosha xun, isla markaana xoriyadiisa usoo celiyaan Weriye Maxamed Aadan Dirir oo ka tirsan bahda Warbaahinta Madaxa banan, gaar ahaanna shabakadda Laascaanod.com.
Alla Mahadleh.
Ururka Suxufiyiinta Somaliland ee Secja
Office Hargeysa/Somaliland.