|
|
Hargeysa(Berberatoday.com)-Wasiirka Madaxtooyadda Somaliland Md. Maxamuud Xaashi Cabdi oo u gogol xaadhaya sidii uu gacanta ugu dhigi lahaa xisbi uu Gudoomiye ka yahay, marka uu ka tago ama’se Xukuumadda uu wasiirka ka yahay muddo xilleed keedu dhamaado, ayaa hadii lagaga guuleysto xilka Gudoomiyaha xisbiga Kulmiye oo rag kula loollamayaan hanashadeeda, waxa uu qorsheeyey, isla markaana dhabba kasii xaaadhay inuu Musharraxa waraabe u taaga ah ee Ucid Faysal Cali Waraabe ka Iibsado Xilka Gudoomiyenimada Xisbigaas Ucid.
Waxanu Wasiir Maxamuud Xaashi muddooyinkii u dambeeyey ku hawlanaa dhaq-dhaqaaq siyaasadeed oo dhuumo dhabarku muuqdo uu ka ahaa, kasoo uu kala shaqeynaayey Oday Buurmadow. Qorshahaas oo ahaa in Faysal Cali Warabe iyo xisbigii Ucid ee lagu faaruqiyey buudhigiisa, ay ka taageerayaan qabashada xaflado maqaar-saar ah oo ay taageeraashooda Beesha ay kasoo jeedan ugu soo camirayaan Faysal Cali Waraabe, talaabooyinka oo u dhaqaale faro-badan ku bixiyey wasiirka Madaxtooyaddu si uu tacab iyo maamuus sare usii gashado xisbigan iyo weliba Faysal Cali waraabe, ayaa waxa qorshahaas garab-socdaa mid labaad oo ah inuu Faysal cali waraabe guddida wadahadallada Khaatumo hoggaamiyo, iyo weliba inuu taageero mudo kordhin kasta oo Xukuumadda uu wasiirka ka yahay u baahato. Isagana la siiyo dhaqaale wixii uu qabsado, iyo weliba xooga Dilaal ah oo looga dhiibaayo sida xogguhu sheegeen mashaariicda horumarineed ee hadda dawladdu gacanta ku hayso sida saldhigga iyo shirkadda DP World.
Arrimahaas, waxa daliil caddaan ah u ah, dhaqdhaqaaqyo sida cadceeda ay farta wasiir Maxamuud Xaashi uga dhex muuqato oo bishan aynu ku jirno iyo tii ka horreysayba xaflado maqaar-saar ah oo dadkeeda uu soo yaboohay Boqor Buurmadow oo lagu taageeraayo Faysal Cali waraabe iyo Xisbiga Ucid loogu qabtay Hargeysa Burco iyo berbera oo xafiis madhan uu shalay kasoo furtay. Iyadoo horana boqor isku sheega diranaha u ah wasiir Maxamuud xaashi ee Lacagta ku hadla Mr Boqor Buur-madow uu magaaladda Hargeysa kala qaybgalay kulan wasiir xaashi dhaqaale badan ku bixiyey oo lagu soo nooleynaayey magaca xisbigii Ucid ee khilaafku aasay. Waxana arrintaas lafteeda daliil u ahaa, qaabkii boqor Buurmadow uga dhex baannayey iyo wajiyadda isku beesha ay yihiin Wasiir Maxamuud Xashi oo hoolka ku keliyeystay.
Dhinaca kale, Xogo iyo macluumaad dheeraad ah oo laga helaayo ayaa sheegaya in qorshe laba wajiileyn ah oo wasiirka Madaxtooyadda Somaliland Md. Maxamuud Xaashi ku damacsan yahay hadii ay suuro-geli waydo inuu hanto Xilka Gudoomiyaha xisbiga Kulmiye muuse Biixi dabadii oo ay soo baxayaan Rag Siyaasiyiin ay isku beel yihiin oo kula loolama Xilka Gudoomiyaha Xisbiga Kulmiye, inuu helo kursi kale oo Gudoomiyenimada xisbi ah, si aanu saxadda Siyaasadda uga bixin, isla markaana aanay soo gudhin rajadda hankiisa Siyaasadeed ee Mustaqbalka dambe. iyadoo la sheegay inuu ka cabsi qabo in dhinaca xisbiga waddani laftiisu ay hadhow kaga soo kici doonaan duufaan Siyaasadeed oo lama filaan ah, maadaama oo hirdan Siyaasadeed oo culusi dhex mari doono hoggaamiyaha xisbiga waddani Xirsi Cali Xaaji Xasan, oo isna wax naawilaaya ama’se leh han siyaasadeed, isla markaana sii dhistay dariiqo uu ku gaadho musharraxnimada madaxweynaha ee mustaqbalka dambe. La soco xogo kale oo faahfaahsan.
Xigasho Xogreebnews.com