|
|
Hoggaamiyaha Khaatumo Oo Hargeysa lagu waydiiyey in Dawladda Soomaaliya Ciidamo ka qoranayso Deegaanno Buuhoodle Ka mid tahay
Hargeysa(Berberatoday.com)-Hoggaamiyaha Kooxda la baxday Khaatumo Dr. Cali Khaliif Galaydh, ayaa markii ugu horeysay ka hadlay Warar Maalmihii u dambeeyay sheegayey in Dawladda Federaalka Soomaaliya bilowday inay Ciidamo ka Qorato Deegaannada Bariga Somaliland oo ay Buuhoodle ka mid tahay.
Cali Khaliif Galaydh oo Telefiishanka HCTV Wareysi ku siiyey Magaalada Hargeysa oo uu Safar ku yimid Toddobaadkan, ayaa sheegay inaanu ogeyn Wax Ciidamo ah oo Dawladda Federaalka Soomaaliya ka qoranayso Buuhoodle iyo Deegaannada ku dhow, oo taa beddelkeedana ay jiraan Hawlo Dawladda Soomaaliya uga Muhiimsan inay Xilligan Ciidamo qortaan.
Madaxweynaha Kooxda Khaatumo oo ugu horeyn ka jawaabaya Su’aal laga waydiiyey waxa uu kala socdo Wararka sheegaya in Dawladda Soomaaliya Ciidamo ka qoranayso Buuhoodl, ayaa yidhi “Waxaan ogahay oo ay Khaatumo u samayn karaan iyo Ciidamo ay Khaatumo ka dhex qorayaan (Ma ogi), waayo? Waxyaabo kale oo mudan baa ka horeeya (in Soomaaliya Ciidamo ka qorato Khaatumo).”
Dhanka kale, Cali Khaliif Galaydh wuxuu sheegay in isaga iyo Madaxweynaha Somaliland Md. Axmed Maxamed Maxamuud (Siilaanyo) ka heshiin karaan Xurgufta Siyaasadeed ee u dhexeysa Khaatumo iyo Somaliland, haddii buu yidhi Shacabka Somaliland ogolaadaan, “Shacabka Somaliland hadday ku taageeraan, Aniga iyo Siilaanyo waanu heshiin karnaa, laakiin Shacabka Somaliland waxaanu diyaar ahayn kuma Qasbi karo Siilaanyo..”ayuu yidhi.
Berberatoday.com