|
|
Algeria(Berberatoday.com)-Waddanka Algeria oo ka mid ah dalalka carbeed ee dhaca Woqooyiga Qaaradda Afrika ayaa shaaciyey in dhibaato weyni ka haysato oo uu khaatiyaan ka taagan yahay guur qarsoodi ah oo ay haweenkoodu ku guursanayaan rag Shiinays ah taasina ka hor imanayso qawaaniinta guurka iyo Arrimaha qoyska u yaalla dalkaasi Aljeeriya walise aanay haweenka dalkaasi ka waantoobin in ay qarsadaan rag badan oo Shiinays ah oo ay siyaalo kala duwan u guursanayaan.
Sida ay baahisay wakaaladda wararka ee dalka Aljeeriya, xukuumadda dalkaasi waxa ay walaac weyn ka qabtaa korodhka uu isku soo tarayo guurka qarsoodiga ah ee ay haweenka dalkaasi ku guursanayaan Shiinayska gaar ahaan guurka loo yaqaano “Zawaaj Al-curfi” oo ah nooc guur oo dalkaasi sharci ahaan aan laga ogolayn oo ah guur muddo kooban ku siman oo aan loo marayn habkii iyo hannaankii guur ee dhaqan ahaan dadka dalkaasi u guursan jireen waana xaajo ugub ku ah dalkaasi oo walaaceeda leh.
Inkasta oo juquraafi ahaan dalalka China iyo Algeria aanay isku dhawayn haddana xidhiidho ganacsi iyo kuwo aqooneed ayaa keenay in muddooyinkii dambe labadaasi dal aad isugu furmeen taasina keentay in xidhiidho qarsoodi ah oo hoose dhex maraan ragga iyo haweenka dalalkaasi gaar ahaan ragga Shiinayska ah oo iyagu ku dheeraynaya in ay guursadaan haweenka dalkaasi Aljeeriya, walow dhaqan ahaan iyo diin ahaanba labada shacab ee dalkaasi aad u kala fog yihiin.
“Kiisas boqollaal ku dhaw oo ah nooc guur oo qarsoodi ah ayaanu diiwaan gelinay kaasi oo haweenka dalkan Aljeeriya ku qarsanayaan rag badan oo shiinays ah. Arrinkani muddo ayuu soo taxnaa dhaqan ahaanna waanu fahmi la’nahay sida uu u socdo. Wax xidhiidh bulsheed ah oo hore uga dhaxeeyey dalalka Aljeeriya iyo China ma jiro oo inta badan dadkayaga waxa ay isku furnaan jireen Faransiiska oo isagu ahaa dalkii na gumaystay balse Shiinaha meelna iskama aanu soo gaadhi jirin. Walaac weyn ayay nagu haysaa arrintani” sidaa waxa yidhi xeer ilaaliyaha dalkaasi Aljeeriya oo la hadlayay wakaaladda wararka ee dalkiisa.
Dhawr kiis oo guur ah oo muran dhaliyey oo dhex maray haween muwaadiniin ah iyo rag shiinays ah ayaa maxkamadda ku jiray maalmihii ugu dambeeyey. Haween badani waxa ay ubad ku dhaleen noocan guur ee qarsoodiga ah maadaama ay inta badan haweenku sidan u yeelayaan iyaga oo ka werwer qaba in aan waalidkood u ogolaan guurka ragga shiinayska ah taasina keentay in ay qarsadaan raggan.
20-kii sano ee ugu dambeeyey waxa sida daadka ugu soo qulqulayay dalkaasi Aljeeriya Shiinays badan oo ka hawl gala shirkado labada dal iska kaashadeen iyo arrimo ganacsi taasi oo keentay in rag aad u tiro badan oo shiinays ahi haweenka dalkan u guursadaan hab qarsoodi ah iyaga oo marka la qabtana sheegta in ay qaateen diinta islaamka. Xukuumadda dalkaasi Aljeeriya ayaa la filayaa in ay go’aan ay arrinkan ka gaadhay ku dhawaaqdo toddobaadkan iyaga oo gabi ahaanba mamnuucaya noocan guur ee haweenkoodu ku qarsanayaan ragga shiinayska ah.
Source:- Foore