Tirinta Codadka Gobolada Iyo Degmooyinka Dalka Oo Lasoo Gunaanaday Marka Laga Reebo Codadka Gobolka Maroodi-jeex Oo Wali Socda+Guddiga Doorashooyinka Qaranka Oo La Filayo Inay Warbaahinta Goor Dhaw La Hadlaan Iyo Shacabka Somaliland Oo U Dhag Taagaya Ku Dhawaaqista Natiijada Doorashada

Hargeysa(Berberatoday.com)Nov.16,2017-Iyada ay labadii maalmood ee u danbeeyey ay socotay tirinta codadka la kala helay doorashadii madaxtooyada Somaliland ee dalka ka dhacday 13 Nofember ayaa waxa gabi ahaanba soo dhamaaday tirinta codadka gobolada iyo degmooyinka dalka Somaliland.
Waxaana codadkii lasoo tiriyay ee degmooyinka sida naloo sheegay lagu soo xareeyey gobolada dalka,iyaga oo xisbi kastena uu haysto natiijada codadka uu ka haysto gobolada iyo degmooyinka dalka Somaliland.
Xogaha nasoo gaadhaya ayaa waxay daaha ka faydeen in lasoo gabagabeeyey tirinta codadka gobolada Sanaag,Sool,Togdheer,Saaxil Iyo Gobolka Awdal oo xalay si rasmi ah isna loo soo gabagabeeyey tirinta codadkii doorashada.
Xisbiyada KULMIYE iyo WADDANI oo xamaasad aad u daran ka dhaxayso ayaa ku kala horeeya codadka gobolada,iyada oo gobolada qaarna uu hogaaminayo xisbiga WADDANI,gobolada qaarna uu hogaaminayo xisbiga KULMIYE.
Gobolka Maroodi-jeex oo ayaa waxa isaga wali socota tirinta codadka doorashada,waxaana guddiga komishanku ay wali ku guda jiraan tirinta codadka ay kala heleen xisbiyadu,waxaana la filayaa in guddiga komishanka Qaranka Somaliland ay goor dhaw la hadlaan warbaahinta kana hadlaan halka ay ilaa hadda hawshu marayso,iyada oo la filayo in guddiga komishanku ay caawa ku dhawaaqaan natiijada hordhaca ah ee codadka ay kala heleen xisbiyada Qaranku ee UCID,WADDANI iyo KULMIYE.
Gunaanadkiina Shacabka Somaliland ayaa iyagu waxay aad ugu dhag taagayaan ku dhawaaqista natiijada doorashadda madaxtooyada Somaliland oo la filayo in labada maalmood ee soo socda si rasmi ah ay guddiga komishanku ugu dhawaaqaan murrashaxa madaxwayne iyo ku xigeen ee ku guulaystay inay manjaraha u hayso shanta Sanno ee soo socota Qaranka Somaliland.