|
|
Hargeysa(Berberatoday.com)-Xildhibaan Siciid Cilmi Rooble oo ka mid ah Mudaneyaasha Golaha Wakiillada Somaliland, ayaa ka hadlay Doorashadii Madaxtooyada ee Dalka ka dhacday isla-markaana Hambalyeeyay Madaxweynaha la doortay Muuse Biixi Cabdi.
Xildhibaan Siciid oo Shalay Saxaafadda kula hadlay Magaalada Hargeysa, ayaa sidoo kale Musharraxa WADDANI iyo Guud ahaan Masuuliyiintaas ku bogaadiyey aqbalaaddii Natiijada Doorashada.
Xildhibaanka oo ugu horreyn ka hadlaya Aqbalaaddii Natiijada Doorashada ee Musharraxa WADDANI Md. Cabdiraxmaan Maxamed Cabdillaahi (Cirro), ayaa yidhi “Xisbiga WADDANI iyo Saaxiibkay Cabdiraxmaan-Cirro waxaan ku bogaadinayaa sida wanaagsan ee Tudhaalaha ah ee uu u hambalyeeyay Guusha Xisbiga KULMIYE.”
Xildhibaan Siciid wuxuu u duceeyay Madaxweynaha la doortay “Madaxweynaha cusub waxaan leeyahay Hambalyo, ILAAHAY ha kugu guuleeyo xilka culus ee ILAAHAY ku saaray..” ayuu yidhi, waxaanu intaa ku daray “Xilkaa markii aad dooneysay wuu Macaanaa, laakiin waxaan filayaa maalintii lagu doortay inaad garatay waxaad doonaysay wuxuu yahay.”
Mudane Siciid wuxuu Madaxweynaha la doortay u soo jeediyey inuu haggaajiyo Nidaamka Dawladnimo ee Somaliland “Meel walba way dalooshaa, Nidaamku wax badan oo toosin ah ayuu u baahan yahay ee ILAAHAY ha kugu guuleeyo.” Ayuu yidhi, waxaanu intaa sii raaciyey isla-markaana uu ammaanay Madaxweynaha Xilka ka degaya “Madaxweyne Siilaanyo waan u sii ducaynayaa, Madaxweyne aad iyo aad baan kuugu bogaadinayaa sidaad Waddanka u soo wadday inkasta oo Gal-daloolooyin jireen, haddana yeelkadeed’e sida wacan ee aad u wadday, Taariikh fiicanna waad leedahay.”
Berberatoday.com