Arrinkan ayaa shalay buuq iyo sawaxan xoogan ka dhex abuuray wasaaradda dhalinyarada iyo ciyaaraha,sida ay noo xaqiijiyeen masuuliyiin ka tirsan wasaaradda .

Wasaaradda maaliyadda ayaa mushahar 9 bilood ah waxay usii daysay shaqaale hoosaadka xafiiska xidhiidhida ciyaaraha kala duwan ee wasaarada ciyaaraha oo ay ka maqan yihiin 11 Bilood oo mushahar ah,waxaana ay wararku sheegayaan in markii lacagtaasi baanka gaadhay ee ay doonteen gudoomiyayaasha xafiiska xidhiidhada ciyaaruhu in maamulaha baanka dhexe ku wargaliyey in lacagtaasi lagu shubay akoonka wasaaradda,isla markaana laga jarayo lacag dayn ah oo 190 Milyan gaadhaysa oo ay kasii qaateen masuuliyiinta ugu saraysay wasaaradda ciyaaruhu,iyada oo sida la sheegay uu lacagtaasi gacantiisa kaga qaaday baanka agaasimaha guud ee wasaarada Maxamed Xuseen Axmed (Dhabeeye).

Wararkan ayaa intaasi ku daray in lacagtaasi daynta ah ee ay amaahdeen madaxda wasaaradu ay kaliftay kadib markii uu madaxwayne Siilaanyo ka joojiyay dhamaan hay’adaha dawlada kharashaadkii kale ee lagu dhex qarin jiray lacagaha xad dhaafka ah ee sifaha dahsoon loo isticmaali jiray ama loo lunsan jiray,waxaana ay keentay in baanku markii uu garan waayay si kale oo uu uga qaado lacagtaasi daynta ah ee badan ee ay qaateen masuuliyiinta sare ee agaasimaha guud iyo wasiirka ciyaaruhu inay dhexda u galaan lacag dirqi loogu soo daayay shaqaale hoosaadka xafiiska xidhiidhada kala duwan ee wasaarada ciyaaraha oo muddo sanad ah bilaa mushahar ahaa,waxaana shalay ay arrintan ka abuurta wasaaradda ciyaaraha buuq iyo sawaxan ay sameeyeen shaqaalahan lacagtooda loo sheegay in laga jarayo dayn ay qaateen hogaanka wasaaraddu.