Hargeysa(Berberatoday.com)-Garyaqaanka Guud ee Qaranka JSL Mudane Cabdisalaan Cumar Maal ayaa sheegay in aanay awood sharci u lahayn dawladaha hoose inay qorsheeyaan dhulka danta guud ah, balse awoodaasi dayacday dawladda dhexe, haatana loo baahanyahay inay qaadato doorkeedii.

Garyaqaanka Guud ee Qaranka ayaa arrintan kaga hadlay wareysi gaar ah oo uu shalay siiyay HCTV, su’aal ka mid ah wareysigaasi oo Garyaqaanka Guud lagu weydiiyey sida uu u arko Qorshaha Wasaaradda hawlaha guud haatan ku doonayso in lagu wareejiyo dhulka danta guud ah iyo dareenada kala duwan ee aqbalaada iyo diidmada isugu jira ee ay ka kala bixiyeen Maayirada magaalooyinka waa weyn ee Hargeysa iyo Burco, ayaa waxa uu ku jawaabay sidan, “Waddanka qawaaniin iyo shuruuc baa jirta oo kala haggaya awoodaha ay kala leeyihiin dawladda dhexe iyo dawladda hoose, waxaanay dawladda dhexe awood u leedahay marka la eego dhulka magaalooyinka waxay masuul ka tahay qorshaynta, inay sameyso Master plan oo ay ku wareejiso dawladda hoose, si ay markaasi ugu dawladda hoose na ugu fuliso bixinta dhulalka si waafaqsan oo aanay meeshii degsiimada aheyd aanay ka dhigin meel ganacsi, iyadoo oo aan loo marin nidaamkii sharciga ahaa, dawladda hoose na uma bixin karto si ka duwan sida uu Master plan-ka ugu jiro, markaa waa inay dawladda dhexe ku xakamaysaa dawladda hoose waxay fulinayso”. Garyaqaanka Guud waxa uu intaasi ku daray “Dhibaatada jirtaa waxa weeyaan Somaliland ma jirto hal magaalo oo leh Master Plan, Hargeysa na dhehoo, markaa dawladaha hoose way qorsheystaan dhulka, waxaanay u bixiyaan sida ay doonaan, markaa waxa meesha ka maqan doorkii dawladda dhexe ee ahaa in Wasaaradda hawlaha guud ay u sameyso naqshadaynta magaalooyinka, haddii ay doorkeedaasi qaadanaysona waxan oo khilaafaad ahi may yimaadeen, markaa immika haddii ay dawladda dhexe oo ay hormuud ka tahay Wasaaradda Hawlaha guud nashqadayntii magaalooyinka, markaa dawladaha hoose na waxa waajib ku ah inay raacaan sida nashqadaynta magaaladu dhigeyso, markaa immika dawladaha hoose ayaa qorsheysta, markaa wixii dawladda hoose kuu siiso wixii dan guud ah ama nagu soo wareeji, waa marka hore ba awood umaad lahayn inaad qorsheyso, markaa intaasi ayaa keentay arrintan”. Ayuu yidhi Garyaqaanka Guud ee Qaranka JSL