|
|
Hargeysa(Berberatoday.com)-Suldaanka Guud ee beelaha Arab Suldaan Cumar Suldaan Maxamed Suldaan Faarax ayaa baaq nabadeed u diray beelaha Walaalaha ee shaqaaqadu ku dhex martay deegaanka Dararweyne ee Degmada Ceel-Afweyn ee gobolka Sanaag.
Suldaan Cumar Suldaan Maxamed waxa uu sidoo kale baaq u diray saalaaddiinta Somaliland, oo uu u soo jeediyay inay ka ekaadaan xayndaabka dhaqanka, isla-markaana ay dawladda uga dambeeyaan hawlaha ay u xilsaaran tahay oo aanay wakhti isaga luminnin sii-kala-fogaynta iyo collaysiinta shacabka Somaliland ee walaalaha ah.
Suldaan Cumar waxa uu sidaasi sheegay mar uu Maanta ka hadlayay Munaasibad ay xilka kula kala wareegayeen Agaasimihii Guud ee Wasaaradda Waxbarashada iyo Sayniska Jamhuuriyadda Somaliland Md. Axmed Abokor Maxamed iyo Agaasimaha Guud ee Madaxweynaha Somaliland Wasaaraddaas u soo magacaabay Md. Maxamed Faarax Xareed.
Suldaanka oo Arrimahaa ka hadlayaana wuxuu yidhi “Xukuumadda ayaa u xil saaran inay gacan adag ku qabato (beelaha diriraya). Waxaan laysku haystaa waa dhulkii dawladdu xukumaysay… Wax Alle wax la isku dilayo cidi garan mayso. Intii innaga dhimatay Ilaahay ha u naxariisto, inta innaga dhaawacantayna Allaah ha caafiyo. Meeshaa yaan cid dambe innagaga dhiman. Dawladdu gacan adag ha ku qabato, bulshaduna ha ku garab gasho” ayuu yidhi Suldaan Cumar Suldaan Maxamed
Suldaan Cumar waxa uu sidoo kale baaq u diray Salaadiinta Somaliland oo maalmihii u dambeeyay qaarkood ku baaqeen hadallo waxyeello u geysan kara nabadgalyada iyo midnimada guud ee bulshada Somaliland, “Qodobna waxaan leeyahay odayaashan Madax-dhaqameedka ah. Madax-dhaqameedka waxa lagu ogaa nabad oo ay Ummadda nabaddeeda iyo nolosheeda ka shaqeeyaan baa la doonayaa. Maaha inay nabadda iyo nolosha ummadda burburiyaan. Waxaan leeyahay ku soo noqda dariiqii aad hore u hayseen oo nabadda ka shaqeeya. Uma baahnin Hagar-daamo, dhibaato iyo wax inna suldaara, waxayna u baahan nahay horumar, nolol baynu u baahan nahay, Dadka bani-aadamkani ahna in la ilaaliyo waa waxyaabaha Islaamku xoogeeyay, yaan lagu Tacadiyin Dadka iyo Dalka, waxaan leeyahay halkaa Gacan adag ha lagu qabto, hala adkeeyo.”
Berberatoday.com