|
|
Hargeysa(Berberatoday.com)-Xoghayaha Caddaaladda ee Xisbiga Mucaaradka ah ee WADDANI Barkhad Jaamac Xirsi oo Shalay Shir-jaraa’id ku qabtay Magaalada Hargeysa, ayaa dhaliilay Hannaanka Garsoorka Dalka.
Xoghaye Barkhad wuxuu sheegay in Muddada Xukuumadda cusub ee Madaxweyne Biixi Talada Dalka hayso siyaabo kala duwan loo xidhay Muwaadiniin, isagoo Tusaale u soo qaatay Saddex Qof oo Naafo ah oo uu sheegay in Xadhig loogu xukumay inay Mudaharaadeen “Saddexdii bilood ee Xukuumadda cusub timid waxa dhacay Tacadigii iyo Xidhiggii ugu badnaa, Madaxweynaha Talada hayaa markii lagu jiray Ololaha Doorashada wuxuu ku ololeynayey waxa sarraynaya Sharciga, laakiin Saddexdaa bilood waxa la xidhay Dad ku dhow Dhowr iyo soddon Qof, kuwaasi oo badhkood sidii Maxkamadaha loo geynayey ee Rumaan loogu jarayey lagu iloobay (Saldhigyada) oo Bah-dil badan uu ku dhacay, ha ahaadaan Ganacsato, Culimo, Suxufiyiin ama ha ahaadaan Curyaamiin Cabataye waxa dhacay xukunno fool-xun.” Ayuu yidhi, Xoghayaha Caddaaladda ee Xisbiga WADDANI, waxaanu intaa ku daray “Garsoorku waa gidaarka Dadku ka galaan Dulmiga, Kafadda iyo Miisaanka ayay tahay in Dadka loogu Xaq-sooro, laakiin waxa Cad in Garsoorkii la marin habbaabiyey oo Garsoorkii noqday Bahalo galeen iyo meel lagu miirto dhiigga Muwaadiniinta, waxaasina wax la caqbali karayo maaha.”
Waxa kale oo uu Dhaliilay Xukun min Laba Sanadood ah oo lagu xukumay laba Qof oo xaday Wiil yar, halka Dhowr Qof oo Xayawaanka Diinka xadayna lagu xukumay Xukun intaa ka dheer, arrintaasi oo uu tilmaamay inay Meel ka dhac ku tahay Xuquuqda Aadamaha, maaddaama oo Dadkii Xayawaan ay ugaadhsadeen loo qabtay uu xukunkoodu ka dheeraaday kuwii Qofka Xaday ee doonayey inay ka Ganacsadaan “Waad ogaydeen Curyaamiin ayaa min Saddex Sanadood oo Xadhig ah iyo Saddex Milyan oo Gannaax ah loogu xukumay Wasiirro ayaad ka hor buuqdeen. Waxa dhacday Hooyo ilmaheedii laga xaday, waxay tidhi Markii ilmaha la iga xaday meel walba oo Soomaaliya iyo Somaliland ah Cagta ayaan dhigay, kharash baa iga baxay, markii aan helay ee Sharciga la hor-keenay Qofkii Xadayna laba Sanadood ayaa lagu xukumay, kuwa Diin qaatayna waxa lagu xukumay Afar Sano iyo 3 Sano, goormuu Xayawaanku ka xurmo batay aadamaha, Caddaaladda noocaas ahi xaggay ka timid.” Ayuu yidhi, waxaanu intaa sii raaciyey “Garsooraha kiiska haya markii la waydiiyey maxaad laba Sanadood ugu xukuntay (Qofka xaday Ilmaha yar) wuxuu yidhi Sharci baanu u waynay, waa maxay Sharciga kuu fasaxaya inaad Qofka soo xidho, ee haddana marka Maxkamadda la keeno aad waayeyso waxaad ku xukunto…”?
Xoghayaha Cadaaladda WADDANI waxa kale oo uu sheegay “Haddii Maamulku xumaado, Garsoorkuna xumaado Dalkan meel u badbaadaysaa ma jirto, Dadkuna sidaa aqbali maayaan. Waxaanu ugu baaqaynaa Guddi hoosaadka xuquuqal Aadamaha ee Golaha Wakiilladu inay Maxkamadaha soo galaan, guddiga Caddaaladda Qaranku inay garsooreyaasha eegaan, in Ummadda laga qabto Tacadiga Maalin walba Garsoorka gudihiisa lagaga samaynayo, haddii kale Muwaadiniintu waxay xaq u yeelanayan inay lixda Gobolba kaga Mudaharaadaan Garsoorka.”ayuu yidhi, waxaanu intaa ku daray oo uu farriin u diray Madaxweyne Biixi “Madaxweynaha waxaanu ugu baaqaynaa wixii aad lahayd Sharcigaa saraynaya (ayaa loo baahan yahay), Waayo? Sharcigu inuu sareeyo iska daayoo saddexdii bilood ee u dambeeyay xuquuqdii Bani-aadamka ayaa lagu tuntay, hadday sidani sidani sii socotana kacdoon Shacab baa abuurmaya. Maxkamaduhu waxay u baahan yihiin dib u habayn dhab ah, Maxkamadaha Masas baa ka buuxa, Maxkamaduhu waxay u baahan yihiin in la sifeeyo, waxay u baahan yihiin Garsoor Caddaalad ah, Maxkamaduhu waxay u baahan yihiin Dad aqoon leh, Waayo? Garsoorkii dalku wuu leexday.”
Xoghayuhu wuxuu sheegay “Waxaanu u hadlaynaa waxa weeyaan, Annaga Xisbi ahaan waxa Mudnaanta koowaad noo ah Xuquuqda Aadamaha, waxa mudnaanta koowaad noo ah in la ilaaliyo Xurmada Aadamaha iyo in la ilaaliyo Saxaafadda iyo Xorriyatul-qawlka.”
Berberatoday.com