|
|
Dubai(Berberatoday.com)-Madaxweynaha Somaliland Muuse Biixi Cabdi, ayaa dawladda Qadar ku eedeeyey inay cadaw u tahay oo ay ka soo horjeeddo Heshiiska Maalgelinta iyo Maamulidda Dekedda Berbera ee ay Somaliland ku wareejisay Shirkadda Imaaraadka Carabta laga leeyahay ee DP World.
Madaxweyne Muuse Biixi iyo Wefti uu hoggaaminayo oo ku sugan magaalada Dubai ee dalka isu-tagga Imaaraadka Carabta, ayaa waraysi siiyey TV-ga Alcayn oo laga leeyahay Imaaraadka Carabta, waxaanu waraysigaas ku sheegay inaanu jirin Xidhiidh Ganacsi oo ka dhexeeya Somaliland iyo Qadar, balse ay jiraan Shaqsiyaad iyo Dad aan tiro badnayn oo Somaliland u dhashay oo ku nool dalka Qadar, kuwaas oo uu tilmaamay inay Tiro ka mid ahi Ciidammo u yihiin dawladda Qadar.
Hase-yeeshee, waxa uu Madaxweyne Muuse Biixi ku celceliyey inuu xidhiidh Ganacsi oo soo jireen ah ka dhexeeyo Somaliland iyo Imaaraadka Carabta oo weliba Sucuudiga, kaas oo uu ku tilmaamay mid wakhtigan sii adkaaday ama sii xoogaystay. Sidaa daraaddeedna, aanay Somaliland isku doorsan karin Qadar iyo Dalalka kale ee Khaliijka ee ay Somaliland xidhiidhka leeyihiin iyo weliba Sucuudiga, isaga oo si cad u sheegay inay Somaliland danteeda eeganayso oo ay si buuxda u taageerayso markasta Sucuudiga iyo Xulufadiisa Imaaraadka.
Muuqaal ka mid ah Waraysigaas oo uu Luuqadda Ingiriisida ku hadlayo Madaxweynaha Somaliland Muuse Biixi Cabdi, ayaannu idiinku soo gudbinaynaa halkan hoose ee Daawwasho wacan oo wanaagsan:-
Berberatoday.com