|
|
Hargeysa(Berberatoday.com)-Mudaneyaasha Golaha Guurtida Jamhuuriyadda Somaliland, ayaa Shalay Cod aqlabiyad ah ku ansixiyey Qaraar uu Goluhu ku taageeray Heshiiska Maalgelinta Dekedda Berbera ee Xukuumaddii hore la gashay Shirkadda DP World.
Sidoo kale, Mudaneyaasha Golaha Guurtidu waxay Cambaareeyeen isla-markaana faro-gelin qaawan ku sheegeen Go’aan lid ku ah heshiiska Maalgelinta Dekedda Berbera oo Golaha Shacabka ee Dawladda Soomaaliya soo saaray Toddobaadkii hore, waxaana Qaraar ay Mudaneyaasha Golaha Guurtida Somaliland farriin loogu diray Qaramada Midoobay, Midowga Afrika, IGAD, Jaamacadda Carabta iyo Dawladaha Somaliland ka taageera Dimuqraadiyadda.
Ka hor inta aanay Mudaneyaasha Golaha Guurtidu Cod Gacan taag ah ku ansixin Qaraarka ay ka soo saareen Faro-gelinta Dawladda Soomaaliya ku hayso Madax-bannaanida Somaliland, waxa qodob qodob Qaraarkaa u akhriyey Xoghayaha Golaha Guurtida Mr. Naasir, waxaanu yidhi sidan:-
Golaha Guurtida markay u caddaatay Faro-gelinta Dawladda Federaalka ah ee Soomaaliya ku hayso Madax-bannaanida Jamhuuriyadda Somaliland.
Golaha Guurtidu markuu garowsaday Waajibaadka Dastuuriga ah ee ka saaran ilaalinta Madax-bannaanida, Qarannimada, Sharafta iyo Shuruucda Jamhuuriyadda Somaliland, Golaha Guurtidu wuxuu go’aamiyey in Jamhuuriyadda Somaliland Qarannimadeeda, Madax-bannaanideedu yihiin Muqadas iyo laguma xad-gudbaan.
Golaha Guurtidu wuxuu cambaaraynayaa Go’aankiii Gardarrada iyo Sharci-darrada ahaa ee Golaha Shacabka Dawladda Soomaaliya ka soo saaray Dekedda Berbera. Sidoo kale wuxuu Goluhu cambaaraynayaa faro-gelinta qaawan ee Dawladda Soomaaliya ku hayso Madax-bannaanida iyo Qarannimada Jamhuuriyadda Somaliland.
Golaha Guurtidu isagoo gudanaya Waajibkiisa wuxuu si buuxda u ayidayaa Maalgeshiga Khayraadka dabiiciga ah iyo Kaabashayaasha dhaqaalaha Dalka, si loo xajiiyo kobcinta dhaqaalaha, Shaqo-abuurka iyo nolosha Bulshada guud ahaanba.
Golaha Guurtidu isagoo gudanaya Waajibaadkiisa Dastuuriga ah wuxuu taageerayaa ansixintii Golaha Wakiilladu ansixiyey 9-kii Augost, 2016-kii ku meel-mariyey heshiiskii Maalgeshiga Dekedda Berbera.
Golaha Guurtidu wuxuu Go’aamiyey in Cid kasta oo ka qayb-qaadata, ku taageerta ama si uun uga gacan siisa Xukuumadda Soomaaliya dhaqdhaqaaqyada lidka ku ah jiritaanka, Madax-bannaanida iyo Qarannimada Jamhuuriyadda Somaliland in loo aqoonsado Cadow Qaran.
Golaha Guurtidu wuxuu ururrada Jaamacadda Carabta, Qaramada Midoobay, Midowga Afrika, Urur-gobolleedka IGAD iyo kuwa Jamhuuriyadda Somaliland ka taageera horumarinta iyo Dimuqraadiyadda u caddaynayaa in dhaqdhaqaaqyada Dawladda Federaalka ah ee Taagta darani ka waddo Mandaqadda Geeska Afrika ay keeni karto Xasillooni-darro cusub, balse Dawladda Jamhuuriyadda Somaliland mar walba waxay Adduunka u caddaynaysaa inay Mabda’ ahaan aaminsan tahay loona baahan yahay in si wada jir ah loo ilaaliyo nabad ku wada noolaanshiyaha geyiga Bariga Afrika.
Golaha Guurtidu wuxuu ugu baaqayaa dhammaan Muwaadiniinta Jamhuuriyadda Somaliland inay si buuxda isku barbar-taagaan Goleyaasha Qaranka iyo Ciidammada Dalka ee ilaalinaya Madax-bannaanida iyo Sharafta Dad ahaaneed iyo Dhul ahaaneed ee Jamhuuriyadda Somaliland.”
Ugu dambayn, waxa Go’aammadan Cod gacan taag ah ku ansixiyey 55 Xildhibaan oo ka mid ah 56 Mudane oo Golaha fadhiyey, Guddoomiyuhuna ma codaynin “Sidaas ayuu Ansax ku yahay Mooshinkaasi.” Ayuu yidhi, Guddoomiyaha Golaha Guurtida Somaliland Saleebaan Maxamuud Aadan.
Berberatoday.com