|
|
Washington(Berberatoday.com)-Madaxweynaha Maraykanka Donald Trump ayaa ku baaqay in dil lagu xukumo dadka daroogada ka ganacsada, arrintaas oo qayb ka ah qorshaha uu wax lagaga qabanayo la qabatinka baaxadda leh ee dadka Maraykanku ay ku adeegsadaan xannuun baabi’iyaha.
Qorshahan ayuu hoosta ka xariiqay mar uu khudbad ka jeedinayay New Hampshire, gobolkaas oo ah mid ay aad u saamaysay arrintaasi.
Trump ayaa sheegay in maamulkiisu uu rabo in sharciga la beddelo si dil loogu xukumo dadka daroogada ka ganacsada, laakiin arrintaas wuxuu kala kulmi doonaa culays dhanka siyaasadda ah iyo mid dhanka sharciyadda ah.
Daroogadan waxaa ka mid ah nooc xannuun baabi’iye loo adeegsado oo dhakhaatiirtu ay bukaanka u qoraan.
2.4 oo ruux oo Maraykan ah ayaa la rumaysan yahay in ay la qabatimeen daroogada, Mushaakilkaas ayaana sababay in ay u dhintaan 63,600 oo Maraykanka oo dhan ku kala noolaa sannadkii 2016, sida ay sheegeen saraakiisha caafimaadku.
Trump ayaa loo sacabo tumay Isniintii markii uu deegaanka Manchester ee New Hampshire ka yidhi “haddii aynaan gacan bir ah ku qabanin dadka daroogada ka ganacsada wakhtiga ayuun baan iska luminaynaa”. Gacantaas birta ahna waxaa ka mid ah in dil toogasho ah lagu xukumo.
Trump ayaa hore u tilmaamay in dadka daroogada ka ganacsada loo adeegsado ciqaabta “ugu adag” wuxuuna hadalkaas ka jeediyay isu soo bax ka dhacay Pennsylvania isla bishan.