|
|
Moqdisho(Berberatoday.com)-Gaadhi waxyaalaha qarxa lagu soo xidhey ayaa ku qarxay degmada Wadajir agagaarka isgoyska Danadwadaagaha waxaana gaadhiga qaraxa lagu xidhey lahaa mid ka mid ah mas’uuliyiinta degmada Wadajir.
Sida ay sheegeen dad goobjoogayaal ah xilligii salaada Maqrib laga soo baxayay ayaa markaliya la maqlay gaadhi meel ku dhow masjid ku yaal oo qarxay.
Wararka ayaa waxa ay sheegayaan in markii uu gaariga qarxayay aysan cidna saarneyn balse waxaa qaraxaasi ka dhashay dhaawacyo soo gaadhay dad ku sugnaa halka uu ku qarxay.
Sida ay sheegayaan dad goobjoogayaal ah waxaa masjidka ku tukunayay mas’uuliyiin ka tirsan maamulka degmada Wadajir ee gobolka Banaadir.
Ma jiro wax war ah oo ka soo baxay laamaha ammaanka iyadoo toddobaadkanay tahay markii labaad gaari lagu xirey waxyaalaha qarxa inuu ku qarxo magaalada Muqdisho gaar ahaan degmada Wadajir.
Berberatoday.com