|
|
Hargeysa(Berberatoday.com)-Guddi hoosaadka ilaalinta iyo dabagalka hantida Qaranka ee Golaha Wakiillada Jamhuuriyadda Somaliland, ayaa kulan gaar ah kala la yeeshay Maareeyaha Hay’ada Duulista, si ay wax uga ogaadaan duruufaha iyo waayaha maamul ee ku harreeraysan ee ay ka dhaxashay xukuumadii hore ee hoggaaminayey Axmed-Silaanyo, iyo qorshaha Xukuumadan Madaxweyne Biixi ay ku wajahayso si ay uga samato baxdo.
Kulankan, oo shalay ka dhacay xarunta golaha Wakiillada ayaa ahaa mid albaabadu u xidhnaayeen oo aanay warbaahintu goobjoog ka aheyn, balse markii uu soo dhammaaday ayaa Guddoomiyaha guddiga ilaalinta iyo dabagalka hantida Qaranka ee Golaha Wakiillada Xildhibaan Naasir X Cali Shire, uu warbaahinta faahfaahin ka siiyey ujeedada kulankaasi iyo waxyaalihii ay kaga wada hadleen Maareeyaha Hay’ada Duulista Duuliye sare Maxamed Cabdi Rodol, waxaanu Xildhibaanku uu yidhi, “Xeerka la yidhaa hay’ada duulista maddaniga ah ee xeer lambar 70 ee golaha wakiiladu ansixiyey, waxaana hore u jirtay wasaarad la yidhaa duulista oo uu joogay Wasiir, haddii aad eegto qodobada xeerka hay’adana waxa meelaha qaarkood ka soo baxaysa erayga Wasiir, markaa waxaanu wax ka weydiinay haddii aad hay’adii madax ka noqotay sidee ayaad ula jaanqaadi kartaa erayga Wasiir oo ay wasaaradii meeshii ka baxday, xeerkiina uu samaysanyahay, waxaana halkaasi nooga soo baxday inay hay’ad ahaan inay u baahanyihiin in mustaqbalka dhaw wax ka bedal iyo kaabis lagu sameeyo xeerkan”.
Xildhibaanku waxa kale oo uu si adag u iftiimiyey waayaha iyo xaaladda madaarka caasimada ee Cigaal International Airport, “Madaarka, marka la eego Wasiiradii u kala dambeeyay dhammaan waxay wareejiyeen wax kasta oo ku xeernaa Madaarka, waxaana weeyi Parkin-kii waa la wareejiyey oo Private ayaa laga dhigay waxaana ka shaqeysa shirkad loo yaqaano DELTA, waxa kale oo la wareejiyey Amnigii, waxaana ka shaqeysa shirkad la yidhaa SRM, Shidaalkana waxa ka shaqeysa shirkad la yidhaa STAR, waxaana noo cadaatay oo doodayadii ka soo baxday in hawshaasi immika lagu jiro oo ugu yaraan arrimahaasi qaar ka mid ahi ay gacanta dawladda ugu soo noqon lahaayeen, waxaana hawshaasi galay oo naga hor dhacay Hanti dhawraha guud ee Qaranka oo hadda gacanta ku haya baadhista shirkadahaasi”, waxaanu intaasi ku daray, “Waxaana immika inoo shaqeeya Madaarka Hargeysa oo kaliya, taasina waanu ka wada hadalnay in madaarada kale ee dalka la maalgeliyo, hasa yeeshee miisaaniyadii sanadkan loo sameeyay may noqon mid ku filan, waxase uu Maareeyuhu noo xaqiijiyey in mustaqbalka dhaw tallaabooyinkaasi u qorsheysantahay haddii ALLE yidhaa”.
Dhinaca kale, Xildhibaan Naasir waxa kale oo uu sheegay in maamulkii hawada ay la wareegtay Soomaaliya, “Maareeyuhu wuxuu noo xaqiijiyey inay qodobka Hawada ay la wareegtay waddanka aynu jaarka nahay ee Soomaaliya, waxaanu noo cadeeyay inay arrinkaasi tallaabooyin fara badan ka qaadeen oo ay sugayaan inay keenaan tallaabooyinkaasi arrimo midho dhal ah oo wax ku ool ah,
Berberatoday.com