Kulanka ayaa ku bilaawday si xiiso badan waxayna labada xul Croatia iyo England ay qeybtii hore ay soo bandhigeen qaab ciyaareed aad u xiiso badan oo farsamadeedu sarayso Waxaana qeybtii hore ee ciyaarta la moodaayay inay kooxda dalka England gacan sarayso.

Cayaarta ayaa lagu kala nastay qeybtii hore 1-0 uu ku hogaaminayay xulka qaranka England, kadib markii uu u dhaliyay daqiiqadii 5-aad ee bilawga qeybtii hore xidiga Kieran Trippier oo dhaliyay laad xor ah ee aad u qurxoon.

Labada xul ayaa inta lagu jiray qeybtii hore waxay sameeyeen fursado halis ah, balse waxay ku guuldareesteen in ay goolal u badalaan.

Dib markii loogu soo laabtay qeybta labaad ee ciyaarta xulka qaranka Croatia ayaa qabtay shaqo adag si uu u soo barbareeyo goolka ciyaarta looga hogaaminayay.

Laakiin Croatia ayaa rajada ay qabtay waxay u suuragashay daqiiqadii 61-aad kadib markii uu gool u dhaliyay xidiga kooxda Inter Milan Ivan Perisic oo caawin ka helay Sime Vrsaljko, waxayna ciyaarta sidaas ku noqotay barbaro 1-1.

Waqtiga loogu tala galay ciyaarta ee 90-ka daqiiqo ayaa wuxuu kusoo idlaaday barbaro 1-1, waxaana lagu daray 30 daqiiqo oo dheeri ah.

Xulka qaranka Croatia ayaa la yimid gool daqiiqadii daqiiqadii 109-aad ee waqtiga dheeriga ahaa ee ciyaarta lagu daray kadib markii uu u dhaliyay Mario Mandzukic oo caawin qurux badan ka helay Ivan Perisic.

Ugu dambeyna kulanka ayaa ku dhamaaday 2-1 oo ay guusha ku raacday xulka qaranka Croatia oo u guday kulanka finalka koobka adduunka ay kula ciyaari doonaan dhigooda dalka France.

berberatoday.com