|
|
Jig Jiga(Berberatoday.com)-Ciidamada Milatariga ee dawlada Federal-ka Itoobiya , ayaa saaka la wareegay xarumaha dawlada deegaanka Soomaalida oo ay ka mid yihiin Madaxtooyada , xarunta Baarlamaanka iyo Telefiishanka ESTV oo ku hadla afka maamulka .
Warar xog-xogaal ah oo aan ka helay dad xaalada la socda , ayaa sheegaya in talaabada ay qaaday dawlada dhexe ay ka dambaysay , ka dib markii la helay xalay warbixin sheegaysa in Madaxweyne Cabdi Maxamuud Cumar uu qorshaynayo in kaga dhawaaqo go;aan ka dhan Itoobiya kulan uu la yeelan lahaa Baarlamaanka maamulku maanta .
Wararka qaar , ayaa sheegay in Madaxweynaha lagu hayo Garab-case oo u dhaw magaalada Jigjiga oo ay saldhig ku leeyihiin Milatariga Itoobiya .
Saaka waaberigii , ayaa ciidamadu ay la wareegeen magaalada , iyaga oo amar ku siiyay saraakiisha maamulka in ay xidheen xafiisyadooda oo ay ku laabtaan guryahooga
Qaar ka mida Golaha wasiirada , oo si toos uga hadlay baraha bulshada , ayaa sheegay in Jigjiga lala wareegay .
Ciidamada Liyuu booliska ee maamulka , ayaa rasaas ku furay ciidamada Federal-ka , laakiin lama oga khasaaraha ka dhashay .
Kooxda mucaaradka ah ee Dulmiid la baxday oo shir uga socday magaalada Diridhaba , ayaa lagu wadaa saacadaha soo socda in ay soo gaadhaan magaalada Jigjiga .
Cabdi Maxamuud Cumar , ayaa isla galabta lagu wadaa in uu ka hadlo Telefiishanka oo uu ku dhawaaqo in uu iscasilay.
Berberatoday.com