|
|
Addis Ababa(Berberatoday.com)-Sida ay sheegayaan wararka inaga soo gaadhaya dalka Itoobiya waxaa xabsiga ku xanuunsanaya Madaxweynihii dowlad deegaanka Somalida Itoobiya.
Cabdi Maxamuud Cumar, ayaa la sheegayaa in xilligaan uu dareemaayo xanuun, isaga oo ku jira xabsiga.
Hooyada dhashay Madaxweynihii dowlad deegaanka Somalida Itoobiya oo muuqaal laga soo duubay kaga hadashay xaaladda Cabdi Maxamuud Cumar ayaa waxa ay sheegtay xanuun inuu dareemaayo xilligaan.
“Magaceygu waa Deed Mahad Colow, waxaan ahay Hooyada dhashay Madaxweynihii hore ee DDSI Cabdi Maxamuud Cumar, waxaan idinka codsanayaa dhammaan Soomaali Maxamed meel walba oo ay joogto inaad cafisaan Cabdi Maxamuud oo gacanta ugu jira cadow, waxaan R.W Itoobiya ka codsanayaa inuu wiilkeyga ii saamaxo”. Ayay tidhi Hooyada dhashay Cabdi Maxamuud.
Cabdi Maxamuud Cumar ayaa 27-kii August ee sanadkan lagu xiray xabsi ku yaalla magaalada Addis Ababa, kadib markii gurigiisa ay ka soo kaxeeyeen ciidanka Itoobiya, eedeymaha loo heysto waxaa ka mid ah dhibaatooyin loo geystay dad shacab ah.
Berberatoday.com