|
|
Pyongyang(Berberatoday.com)-Sawirro uu qaaday dayax gacmeed dulmaray xarun ku taal meel u dhow caasimadda Pyongyang ayaa muujinaya in Kuuriyada Waqooyi ay isu diyaarinayso inay tijaabiso gantaal ama ay hawada sare u dirto satellite.
Warkan ayaa ku soo beegmaya maalma uun ka dib markii ay laba xarumood oo cilmi baarista ah oo Maraykanka ku yaal ay sheegeen in dalkaasi uu dib u dhisay goob gantaallada laga riddo.
Kuuriyada Waqooyi ayaa u muuqata inay samaysanayso gantaal ay mustaqbalka dhaw tijaabin doonto, sida ay tilmaamayaan khubarada hubka ee Maraykanka.
Dhaq-dhaqaaq ballaaran ayaa ka socda xarunta gantaallada lagu diyaariyo ee Sanumdong oo ku taal meel u dhaw caasimadda Pyongyang.
Gawaafhi xamuul ah ayaa la arkay iyagoo galaya ama ka baxaya xaruntaasi, taasoo sida horay looga bartay ka dhigan in Kuuriyada Waqooyi ay goobtaasi geyneyso gantaal si ay uga ganto.
Sida ku cad sawiradda la baahiyay, xukuumadda Pyongyang ayaa dib u dhistay goobta ay ka ridi jirtay gantaallada, waxaana suuragal ah in hadda ay si buuxda u shaqeyso.
Khubarada qaar ayaa ku doodaya in Kuuriyada Waqooyi ay hawada sare u diri rabto dayax gacmeed oo aanay tijaabin rabin gantaal, balse taa xitaa waxa ay meel ka dhac ku noqonaysaa ballanqaadkii uu Kim Jong-un u sameeyay Donald Trump.
Dayax gacmeed ay hawada u dirto Kuuriyada Waqooyi ayaa sidoo kale caqabad ku noqon kara wadahadallada u dhexeeya Maraykanka iyo Kuuriyada Waqooyi, sida horay u dhacdayba.
Berberatoday.com