Guddoomiyuhu waxa uu tilmaamay ujeedada tababbarkaasi iyo ahmiyadda uu leeyahay ba, “Tababbarkani waa Xuquuqul Insaanka oo ah sida marka la qabanayo dadka loola dhaqmayo oo ay ugu muhiimsan tahay dadkaa marka la qabanayo in si sharci ah loo soo qabto oo waddadii sharciga aheyd loo soo maro oo aan qofka layska qaban karin, waxay dadku ku xusuustaan wixii berrigii hore soo maray in aan lagula kicin”. Waxaanu intaasi ku daray, “Suxufiyiinta laftigoodu waxay u baahan yihiin inay tababbar yeeshaan oo ay hab dhaqanka Warbaahinta iyo Suxufinimada ba ay aad u bartaan, waxaana laga yaaba in labadoodaba ay ku xeeran yihiin durruufo dhaqaale oo aanu waqtigu siin, hase ahaatee dedaal badan ayaanu ka wadnaa taasi waxaana ugu muhiimsan inay dadku wada hadlaan”.

Maxamed Baaruud waxa kale oo uu ka hadlay baraha bulshada iyo saameynta ay leeyihiin, “Waxa inagu soo biiray imika waxan la yidhaa Baraha Bulshada oo qof waliba waxa uu doono uu ku hadlayo, taasina way ka dheeraysay shuruucdii la sameynayey ee dawladaha oo inaga oo qudha maaha oo waxa yaaban dawladaha horumaray, waxaana horumarkii dadka ka dheereeyey horumarkii tignoolajiga, taasi ayaana keenaysa inuu qof waliba waxa uu doono uu ku hadlo oo awal waxa u hadli jiray qof u tababbaran, taasoo aan haatan jirin”.

Dhinaca kalena, Maxamed Baaruud waxa uu talooyin u gudbiyey Booliska iyo Suxufiyiinta, “Aniga waxay ila tahay dalka waa lawada ilaashanayaa Boolis iyo Suxufiyiin ba, laakiin hab dhaqankii ayaa la doonayaa in laysla jaanqaado oo aanay qolona qolada kale cadow u qaadan, taasina annagu waanu ku jirnaa oo waanu ka shaqeynaynaa”.

Ugu dambayntii, Guddoomiyaha Xuquuqul Insaanku waxa uu ka hadlay kaalinta ay warbaahintu kaga jirto Qaranka, “Anigu waan aqoonsanahay oo waan ogohay in warbaahintu ay tahay tiirka afraad ee Qaranka, balse dad badan ayaan sidaasi u ogeyn, markaa warbaahinta la’aanteed dawladnimo haggaagsani ma jirto”. Ayuu yidhi Guddoomiyaha Xuquuqul Insaanka Somaliland

Berberatoday.com