|
|
Rio Dejinero(Berberatoday.com)-Goolhayaha kooxda Liverpool ee Alisson Becker ayaa ku guuleystay abaal-marinta Samba d’Or Award ee ciyaartoyga ugu fiican laacibiinta u dhashay waddanka Brazil, waxaana kaalinta labaad galay Roberto Firmino.
Alisson oo Liverpool kula guuleystay tartanka Champions League xili ciyaareedkii hore, sidoo kalena qayb libaax ka qaatay bandhiggii cajiibka ahaa ee kooxdiisu ay qaybtii hore ee xili ciyaareedkan kusoo xidhatay hoggaanka horyaalka Premier League , ayaa waxa uu helay 35.54 boqolkiiba codadkii lagu dooranayay laacibka ugu fiican ee la guddoonsiinayo abaal-marinta Samba d’Or Award, waxaana uu farqi aad u weyn ka sarreeyey Roberto Firmino oo helay 23.48 boqoliiba.
Becker oo ka sokow saddexda koob ee Champions League, UEFA Super Cup iyo Club World Cup ee uu la qaaday Liverpool, xulka qarankiisana ka caawiyey inuu ku guuleysto Copa America, ayaa waxa kaalinta saddexaad uu u diray difaaca Paris Saint-Germain ee Thiago Silva, halka uu kaalinta afraadna soo cidhiidhsaday kubbad burburiyaha Liverpool ee Fabinho.
Berberatoday.com